La guerra de' Nicolotti e Castellani dell'anno 1521/9

CLXI

No xe peraltro da maravegiarse
Se sta celada xe saltà in schiape e schiame,
Perchè co' l'è stà tocà, propio parse
Quando un pan fresco se magna con fame.
Scrochina no menava bote scarse,
E la celada no gera de rame
Ma d'azzal cruo, temperao tropo duro,
Che cussì scrive el mio Dotor maùro;

CLXII

El qual gavea sì gran autoritae
E no averave dito una busia
Per quanto val l'inverno co l'istae:
Ma per tornar a dir l'istoria mia,
Gera al veder una gran crudeltae
De quei che gera restai per la via!
Chi strupiao , chi morto, e chi moriva
Chi cria, chi scampa, chi fuor d'aqua insiva.

CLXIII

Gota, Schilato, Panera e Sorzeto,
Scachio, Codogno, Canata e Pesoco;
Scardola, Carotin, Bresuola e Peto,
Caroba, Manto, Tartufola e Croco,
Zan-fastidio e Marmeta e Bigoleto,
E po' tant'altri che qua no ve scroco,
Scampava in fuga da paura storni
Per no scurtar de la so' vita i zorni.

CLXIV

Zonfeto gera sentao su i scalini
Ch'el feva conto d'andar in Sagrao,
Tagià l'aveva tuti do' i ventrini,
Anca una sepa a traverso del cao,
E Giurco aveva passà i ventresini
Con un sponton che Tasso gh'avea dao;
Ochi-de-sepa gera stà sorbìo
Da Topo, e Fiuba avea Lelo sbasìo.

CLXV

La sera gera squasi sul brunir
Quand'eco arivar cento Oficiali;
Chi scampa qua, chi scampa là in t'un dir
Che certo alora no i gaveva cali.
La s'à dovudo in sto muodo finir,
Che se questo no gera, tanti mali
Se feva avanti che vegnisse sera
Che s'incariva le stamegne e la cera.

CLXVI

Gera romasi co i pugni serai
Do' Castelani, un Gnato e un Canaruol;
Questi su tole a casa è stà portai.
I so' parenti se lamenta e duol,
Digando: Al mondo no vegnirà mai
I pì valenti, diga pur chi vol!
Pazienza, tuto per voler è stao
De chi cussì bel mondo à fabricao.

CLXVII

Sier Gnagni aveva una ponta in la panza
E sul chiefali una teribil gnasa;
Chineta bionda gera la so' smanza;
S'un costrao el ghe fo portà a casa.
Tuti diseva: No ghe xe speranza.
La so' China pianzando el strenze e basa,
E dise: Che faroi grama, desfita,
Senza vu, caro ben, cara mia vita!

CLXVIII

China, ti perdi tuto el to' contento,
I solazzi, el bon tempo, i to' piaseri;
Chi te farà, co' sarà caldo, el vento?
Chi te comprarà piadene e tagieri?
El so' ben verso mi no gera fento,
El me comprava fin l'ogio, i paveri,
Pan, vin, legne, carbon, fito de cà;
Oh povereta mi, oh desgrazià!

CLXIX

Oh quante volte ghe diseva, oh quante!
Deh, caro Gnagni, no montar sul Ponte,
Ti ghe n'à fato a st'ora tante e tante,
A pì de sete ti à insanguinà la fronte,
E a tanti e tanti le cervele infrante,
Pezo ch'el re Gradasso o Rodomonte;
Questa te basta, anzi che te n'avanza.
Perchè ogni tropo fa doler la panza.

CLXX

Ma el to' gran cuor, la to' tropo bravura,
L'esser de schiata, de razza sbisao,
El no saver cossa che sia paura,
E in te l'arme l'esser stà arlevao,
La to' tremenda e feroce natura,
L'amor ch'ai Nicoloti ti à portao,
Sarà fiera casoni de la to' morte;
Oh stranio raso, oh tropo dura sorte!

CLXXI

Sia maledeto el primo ch'à metuo
St'usanza traditora in sta Citae,
Ch'el par ch'un omo no sia ben nassuo
Quando ch'el teme quatro bastonae!
Chi no monta sul Ponte xe tegnuo
Per poltron, per caia da le brigae;
Costume fiero, usanza traditora,
Causa ch'el fior de tuti i bravi muora!

CLXXII

Cussì diseva la povera China
Pianzando a cao caveli, a strangogion.
Sier Gnagni a puoco a puoco se dechina
E va verso la morte de troton.
Tuti chi 'l vede veramente inclina
Che se possa ordenar la procission.
I so' parenti tuti gera là
Chi va, chi vien, chi torna e chi stà.

CLXXIII

El barbier anca lu xe co i so' ferì,
E stopa e vovi, no mancava gnente
Da cavar sangue, da ordenar crestieri,
Da confortarlo e starghe sempre arente;
Tuti per casa pareva levrieri
A far quanto bisogna prestamente,
E certo, vogio dir la veritae,
S'è visto gran pietà, gran caritae.

CLXXIV

In sto mezo sier Gnagni pezorava;
E fava la vizilia de la Festa;
Tuti a lu atorno, che nissun restava,
Con ciarle e cianze ghe rompea la testa,
Ognun qualcossa se ghe recordava.
Con voce bassa e con la ciera mesta
I l'à pregao ch'el fesse Testamento:
Or suso, Gnagni dise, son contento;

CLXXV

E lasso tuta la mia massarìa
Leto, coltra, nizioli a la mia China,
Con pato ch'essa, ch'è l'anema mia,
S'arecorde de mi sera e matina;
La manopola, el zaco, e la tachìa,
El mio pugnal d'arzento e la squarcina
A mio Cusin, el fio qua de Zan-boba;
Un tapo lasso a mio nezzo Caroba;

CLXXVI

El resto tuto che se venda vogio,
E dei danari che se trazerà
Sia fato un bon livel, che mi no sogio,
Ma che do' Comessarii ordinarà,
I quai vogio che sia Morelo e Sfogio
Per tuto el tempo sin ch'i viverà,
E a la sa morte i deva altri ordenar
Che la Comessarìa diè governar.

CLXXVII

E perchè ogni fadiga vol mercede,
Vogio ch'essi ogn'ano debia aver
Per poder far conzar trezuole e tede
La decima del prò, com'è dover,
E del restante i diè con bona fede
Farne tre parte zuste a so' poder
Che debia esser ogn'ano dispensae,
In presenza de tute le brigae,

CLXXVIII

A quel tre Nicoloti che in quel ano
Sul Ponte i arà mostrà masor bravura
Contra dei Casteloni, e con afano
Ghe arà fato più angossa e più paura;
E che questo se fazza senza ingano,
Con bona volontae sincera e pura;
No vardando nè a sangue, nè a amistae,
Ma a chi merita più, e con realtae.

CLXXIX

Fato el so' Testamento, da là a un'ora
Sier Gnagni scomenzava a borbotar;
China diseva: Ohimei, credo che 'l mora!
A puoco a puoco el no podea parlar;
Sì fredo el gera ch'el vento da buora,
L'à scomenzà po' un poco a zavariar,
Tanto che al fin, inverso la matina,
Gnagni dete de corli in la schiavina.

CLXXX

De pianti s'alza alora un gran rumor,
La so' Chineta i caveli se tira,
Parenti e amici sentiva dolor,
Chi manazza, chi pianze e chi sospira.
El zorno drio, certo con gran onor,
L'è sta sepelìo con torzi de lira,
Segondo che ò trovà scrito per nota,
E drio ghe gera de bravi una frota.