La guerra de' Nicolotti e Castellani dell'anno 1521/8

CXLI

Grongo, sgrignando, diseva: In malora!
Se ghe petava de le sgrinfe adesso
Zuogava d'altro zuogo che a la mora,
I scortegava tuti sin a l'osso.
Respondea Garbo: Co sta dalaora
No m' averave un passo apena mosso,
Che feva de sti zochi tante stele
Che forsi in Ciel no ghe xe tante Stele,

CXLII

Perchè ghe dava cento fossinae
In t'i polmoni e in te le cervele.
Gropo diseva: E mi con piatonae
Ghe mastruzzava i denti e le massele
Che i no magnava pì pan nè panae;
Tagiava teste, man, gambe e parele,
Che m'averave parso arcorger fiori
In t'un zardin a cavarme sti umori.

CXLIII

- Solfa? ti tasi? par che ti sii morto?
- Se vu soli cianzè per pì de cento,
Responde Solfa, e per no farve torto
Dirò anca mi quel ch'in anema sento:
Se poco ananzi me ne fusse acorto,
Da intrar in Porto i no gaveva vento,
Perchè mi ghe tagiava le gambiere
E a casa i feva portar su le civiere.

CXLIV

- Putana de la morte repentina!
S'i me vegniva a tagio, dise Ghiro,
De tuti cinque feva una fassina
E in manco che no se trà un sospiro,
A un, a un, co' se fa una galina,
Ghe dava al colo sì fato destino
Che gh'averave fato insir i fiai,
E i averave in Canale po' slanzai.

CXLV

Ecote in questo un copo a remi, a velo,
In t'una rechia a sier Franca-molena,
E una frezza no mancava un pelo
Ch'a Grongo no schiantasse in te la schena.
Biro s'è voltà in drio, disendo: Chi xelo
Costù che trà? Pota de dona Lena!
Che se l'amaco, al sangue de Diana,
El vogio scortegar come una rana.

CXLVI

In questo un sasso, schiefe, in t'una galta
A sto sier Biro cussì a l'improvisa.
Biro da stizza e da gran dogia salta
Digando: Putanazza de Marfisa!
De le vostr'osse e sangue farò malta
Se ve posso agrapar in qualche ghisa;
Alfin i gera tanto bersagiai
Ch'i à dovudo netar via agrizzai.

CXLVII

Sgombremo, Ghiro, che qua piove sassi,
Se no volemo qualche zucolon.
Diseva Solfa: Grota, slonga i passi,
Andemo a veder se ghe xe de non
Calche capon o figaeti grassi
Da Panza-larga e da Zan-biliron.
E cussì i se ficava in certe betole
Lagando i altri a la guera in le petole.

CXLVIII

No bisognava ch'i stesse pì un fregolo
A sgombrar el paese sti gran bravi;
Perchè Folada con un cerendegolo
Cuogoli trava grossi come ravi,
Che a repararli no ghe gera indegolo;
Sichè a netarse i fo prudenti e savi,
Che se i restava a aspetar quele sorbe
I vegniva portai a casa in corbe.

CXLIX

Tanagia, Lovo, Catego e Schizzao;
Verela, Scogio, Mora e Gataluse;
Argana, Ruspo, Buovolo e Sdentao;
Sti dodese no xe sbisai da fuse;
I se gera tacai con Zan-sberlao
Co le so' mele che tagia e che cuse;
Sberlao, Figiera con Schita e Pachiante;
Agio, Scalogna, Scavazza e Durante.

CL

Sti oto insieme i s'aveva tirai
In cale zo del Ponte de l'aseo
In ordenanza ben intatarai.
Mora, che no gaveva el cuor d'albeo,
Contra de Schita para, tira, e dai,
Tanto che Mora resta senza un deo.
Agio, Scavezza, Durante e Scalogna
Gratava a Ruspo e Buovolo la rogna.

CLI

Gataluse, Schizzao, Scogio e Tanagia
Avanti gera con Argana e Lovo
Co le so' arme che rade e che smagia,
Tanto che Orlando, no credo, nè Buovo
Fesse in so' vita si brava batagia,
Per quanto scrito su l'istoria trovo;
Zembai tre d'essi a corando ai do' Ponti
Dal barbier i li à portai a far i conti.

CLII

Sier Pan-de-megio, Fugazza e Verzoto
Gera a le strete con Morza e Castruzzo,
Bufeto, Ton, Lumaga e Binoto,
Manòli, Forca , Trombeta e Capuzzo:
Slarghemose, i diseva, de sto troto,
No metèmo la vita in t'un scarnuzzo
Per dar solazzo a chi varda la Festa,
Che ride po de chi à rota la testa.

CLIII

Gramola e Toco se ne stava in ala,
Co fa el nochier quando ch'el vol far vela,
El cuor in corpo a tuti do' ghe bala
Per gran vogia de far brilar la mela,
Ma per no se far po' chiamar in Scala
In vazina i lassava la cortela,
E da una banda i s'aveva conzai
A vardar quei che vegniva zembai.

CLIV

Mufo, Penin, Pignata e Franzi-fava
Gera sul campo armai e ben atenti,
Frisopo contra questi slicegava
E da gran grinta gretolava i denti,
Perchè una galìa a picolon gh'andava.
Costù d'Adamo no stima i parenti
E col spadon tira un mandreto tondo
Che 'l manda Franzi-fava a l'altro mondo.

CLV

E a Mufo con un colpo un gomio tagia,
Che no gh'è valsa la manega forte,
E tut'a un tempo d'una ponta smagia
El zanco a sier Penin, che co la morte
El stete più d'un mese a far batagia.
Pignata alfin, quanto ch'el puole forte
Tira el pugnale in la gola a Frisopo,
Talchè de la so' fin el zonze al gropo.

CLVI

Falopa aveva in man un speo da colo,
E coreva costù tuto furioso
Per afrontarse co Zan-pesse-molo;
In questo sorazonze Zan-tegnoso,
Grasso, Scrochina, Sgrinfa, Ragno e Polo;
E per aidar Falopa, Frapa e Toso
Vegniva via saltando, co fa i tori,
Per tagiar gambe e brazzi come pori.

CLVII

Qua se vedeva certa missianza
D'altro che schile, gambari e sardele!
I se petava d'i spei in la panza
Sin che ghe insiva fora le buele;
Da mazzar e strupiar gera so' usanza,
I travasava spae, spei e rodele,
Tirando senza squara nè compasso
Bote da far in pezzi Satanasso.

CLVIII

Ve vogio dir una cossa incredibile,
Che forsi la sarà tegnua per frapa,
Ma per chi à fede ogni cossa è possibile.
Scrochina à dato d'un fendente a Frapa
Su la celada, e 'l xe sta cussì teribile
Ch'in vinti pezzi aponto el ghe la schiapa,
E un pezzo a Sgrinfa à tagiao el naso,
Che mai s'intese el più bizaro caso.

CLIX

El resto dei pezzi, che gera disnove,
Parea balote da schiopi e arcobusi,
Teste rompea come se fosse vove,
Ochi cavava , rompea denti e musi;
No fa tanto rumore el ton co' piove;
Sichè tuti i è restai mezo confusi,
E in fuga a scampar via tuti se messe,
Per timor schitolando in le braghesse.

CLX

Mai no fo visto una bota sì strania,
Sì stupenda, campedega e masenga.
Credo cbe se vegnisse de Betania.
Calche gran doto per chiarirla in renga
Tuti dirave, la xe una sbefania,
E pur fo vero, e no busìa o burlenga,
Perchè l'ò trovà scrito de man propia
De Mistro Pantalon de cà Litropia.