La guerra de' Nicolotti e Castellani dell'anno 1521/5

LXXXI

- No ve partì, aspetè, criava tuti,
Che gaverè scalete e de le nose.
Intorno el Ponte gera mile puti
Che a pì poder i alzava su la ose;
Aspetè, amici, che senza laùti
Vu balerè un baleto senza vuose,
A son de gnacherar e triche trache
Su i schinchl, su i mustazzi e su le lache.

LXXXII

Masorana , Ganzara e sier Zonfeto,
Tuti tre in ato de far dopio atorno,
Se volta in drio, digando: Nu de leto
Se levassèmo suso avanti zorno
Per vegnir a magnar de sto confeto;
Ma vegnì suso, che aspeteu? el corno?
O el Bucentoro che vegna per vu?
In questo tuti tre saltava su.

LXXXIII

Un indrio l'altro, e la vesta revolta
Intorno al brazzo aveva tuti questi,
E anca in cao la celada racolta
A mezo el Ponte per dar i so' resti;
E qua Zonfeto dise: Nico, ascolta,
Perchè la vaga con tuti i so' sesti
Mi farò qua con Bio, e ti, e Ganzara
E sti altri do' se dara la so' tara.

LXXXIV

- Che? semio in campo, da fare ste ordenanze?
Responde Nico; e chiofe con el legno,
Su i schinchi a sto Zonfeto do' naranze;
Che ve so dir che le gh'a lassa el segno,
Digando: Nasa se le xe scoranze.
Zonfo se cazza soto con desdegno
Per vendicarse, e tuti i altri insieme,
E con i legni chi stalì, chi preme.

LXXXV

Zonfeto, de bischizzo, d'una ponta
In mezo al fronte zonze de sier Nico;
A Mazorana la grinta ghe monta
E sul chiefali a Bio dete un bon crico;
In questo tuti sie insieme s'afronta
L'un pì de l'altro menando da sbrico;
S'a visto sier Ganzara d'un scalin
Sbrissar e andar in lenza a petolin.

LXXXVI

Zonfeto in tera, come stà un tapeo,
Gera desteso, che su una caechia
Con un baston (che no gera d'albeo)
Bio gh'avea dato e anca su una rechia.
A farlo revegnir à bisogna aseo
E d'aqua fresca ben pì d'una sechia.
Gera restao sul Ponte Mazorana,
Ma ve so dir co la vita mal sana.

LXXXVII

El sarìa stà pestao come ravizze
Se no gera Baleca, Agresto e Sardo.
Questi no xe da desgresar novizze
Perchè i ressente un poco del vechiardo,
Ma, ve so dir, ch'i sa assetar pelizze
In dosso a chi no è più che gagiardo.
Questi tre salta su senza favela;
Tuti criava: Oh la vol esser bela!

LXXXVIII

Pì de vinti roversi e trenta ponte
Tira costori in un volzer de balchi;
Tanto ch'a questi tre zoso del Ponte
Conyien andar, menando ben i calchi.
Del resto: Mi nol tegno vago a monte,
No vogio che la barca ti me sfalchi,
Diseva Nico; perchè in veritae
Costù dava de mate bastonae.

LXXXIX

In questo salta su con vigorìa
Polo-del-vechio, Paneta e Trombeta;
Tuta la zente fa strepito e cria,
Ma lori i vien subito a la streta.
Baleca co un mandreto buta via
A Polo un'ongia tuta neta neta,
Agresta co una ponta buta in lenza
Sier Trombeta; nè Paneta fu senza,

XC

Che Sardo d'un fendente gh'avea dao
Sul brazzo destro ch'el tegniva el legno;
E d'un roverso po' sora mercao
S'un schinco un colpo ch'el tegnisse in pegno.
Baleca aràve Polo mastruzzao
S'el steva saldo sul Ponte al so' segno,
Ma zo del Ponte el se n'è andà trotando,
Paveta el seguitava zotegando.

XCI

Resta sul Ponte ancora sti vechiardi
Za ben co de le cianze la so' parte,
Fagando salti, mostrando i gagiardi,
Niente stimando nè morte, nè Marte.
I Castelani diseva: L'è tardi,
Saltemo suso a darghe la so' parte.
La zente stava a veder chi montava
E qualcun in deele se levava.

XCII

Musega, Giurco, Cimberle e Gazante;
Zorzeto, Fiuba, Gregheto e Giarcola,
Biscoto, Rizzo, Nico e Zan-dal-Zante,
Scoco, Schiaveto, Tofalo e Nicòla,
Tuti questi con cuore de diamante
Vien sora el Ponte; chi tira, chi mola,
Tuti voleva esser avanti i primi
Per vegnirse afrontar co quei tre grimi.

XCIII

Giurco, che xe pì bizaro d'un orso,
Xe primo avanti a despeto del mondo;
E adosso a Sardo a la prima el xe corso
Con un falso roverso e un dreto tondo.
Sti altri compagni vien drio per socorso
Per cazzar i Gnati fin in tel profondo,
E a Baleca, a Sardo, a sier Agresta
I schinchi resta roti e anca la testa.

XCIV

I Nicoloti gera per morir,
Da la stizza pareva ch'i crepasse;
I Castelani diseva de vegnir
In fina a basso a petarghe le tasse;
I Nicoloti no à possù sofrir,
E fo forza ch'in frota i s'afrontasse;
Come formighe sul Ponte i bogiva
Baiando d'altro son che d'arpa o piva.

XCV

Dei Gnati i primi che s'à cazzà in mezo
Fo Scrochi, Ranco, Tartagia e Ganzara,
E ve so dir che nissun no xe grezo.
Qua se vedeva chi tira, chi para,
No se podea saver chi aveva el pezo,
Che tuti aveva ben la so' capara.
Bastoni in erto se ne vedeva cento,
Chi un ochio roto area, chi in aqua spento.

XCVI

Chi schinchi roti, chi franto gavea el muso,
E più d'un par gera in tera destesi,
Nè fo mai visto rumor più confuso.
Su le soe tuti stè un poco sospesi,
E po', in t'un trato, tuti salta suso
Dandose paghe per pi de tre mesi
In bone pache e pusche de contai
Con legni dreti, storti e squadrizai.

XCVII

No fo mai vista sì bela barufa
Come che gera tra sti zovenazzi;
I se cavava, ve so dir, la mufa
Da le celade e anca da i mustazzi.
Tra quei che varda, chi ride, chi sbufa,
Con musi verdi, zali e paonazzi;
Calcun fa per criar cussì gran boca
Che l'una e l'altra rechia le se toca.

XCVIII

Piene le fondamente, anca le case;
Altane, copi, fisolere e barche
Per veder gera qua, che no romase
A mala pena i morti in te le arche.
Che tanto a tuti sta bagia ghe piase,
Massimamente quando segni o marche
Sul viso fato vien a qualche zaltro
Che xe poltron, e vol mostrar el scaltro.

XCIX

Come v'ò dito, da tute le bande
A mezo el Ponte ghe ne gera assai,
Che ve so dir ch'i se le deva grande,
E per longo e per tresso da ogni lai.
Qua vin de Marca in tera no se spande
Ma sangue rosso e da no guarir mai;
Frignocole de lira i se petava
Che con lissia e saon no se lavava.

C

Mentre la frota gera sul più belo
No se podea saver chi avesse el pezo;
E ognuno stava co l'ochio a penelo,
E gera giusto spartìo el Ponte in mezo.
Un certo Sarasin, chiamao Mengrelo,
Forsi con scusa da finzer el grezo,
O ch'el diavol ghe l'abia menao,
O pur da stizza d'esser stà legnao;