La guerra de' Nicolotti e Castellani dell'anno 1521/3

XLI

Musega, Giurco, Nani, Chiechie e Seco
S'à fato avanti mostrandoghe el viso;
Ma i Nicoloti con altro che steco,
E vò so dir ch'i gh'assetava el griso!
Ma per so' megio i s'à slargà dal seco
Perchè tropo sutil gera el tamiso;
I Nicoloti ghe dava la berta
Digando: Vegnì a tior la vostra oferta,

XLII

Che ve daremo nespole maùre.
No stè a vardar che l'ora sia za tarda
Vu altri no se' za fioi de paure;
Qua no se trase de schiopi o bombarda,
Co fa i soldai che va a piar le mure;
No stemo pì, che le brigae ne varda,
A far da befe, ma femoghen'una
Che sia mazenga avanti che s'imbruna.

XLIII

I Castelani stava mal de vogia
Perchè parechi avea i mustazzi roti,
Pezo che i Greghi quando soto Trogia
Ghe pareva restar tanti merloti,
I pareva apicai, scampai dal bogia,
E i Nicoloti no i valea pì coti;
Se ben anch'essi gera maltratai
Pur i cianzava come papagai.

XLIV

Orsù, i diseva, mo che stemio a far?
Mo no volemio far un par de frote
Avanti ch'el sia l'ora de cenar?
Caminè inanzi, mo gaveu le gote?
Pota! no ve se sente più a bravar;
Aveu i schinchi, o pur le gambe rote?
E mile cianze, e i andava digando;
Che no vien suso un poco el Conte Orlando?

XLV

Un Canaruol, che gera a mezo el Ponte
Con el so' legno in man, la vesta al brazzo
Tirando verso el Ciel roversi e ponte
E da so' posta facendo el bravazzo,
Diseva: Vegna suso calche Conte,
E vegna su d'i più bravi del mazzo,
Ch'el vogio far conosser per poltron;
Cernìlo pur fuora da un milion.

XLVI

Quando la zente à sentì sto Fumao
Ch'è cussì pronto a far tante bravate,
I scomenza a criar: L'è aparechiao,
No te partir, e mena ben le zate.
Murga in sto mezo avanti xe saltao;
E in quatro colpi (no le xe canate)
Fumao perse una rechia, un ochio, un dente;
Se se rideva no ve digo gnente!

XLVII

I Nicoloti xe deventai rabiosi
Quand'i à visto costù col muso roto,
E i feva certi mustazzi grinzosi.
Un vechio antigo, un certo Nicoloto,
Se volta in drio, digando: Cari tosi,
Montemo suso e rompemo el corloto
A questi impegolai che siega asse,
E mi 'l primo sarò a darghe le tasse.

XLVIII

- Sì, sì, pota de Baco! dise Lule,
Femo da seno qua de sto grimardo,
Strupiemo questo che fa tanto el bule,
D'esser el primo, per mia fede, ardo;
Alto ghindemo, la vela s'imbule;
Me par più che Orlando esser gagiardo;
Adesso che ghe n'o bevù un bardaco:
Viva Marte, Vulcan, Cupido e Baco.

XLIX

Vitorìoso in sto mezo sier Murga
Sul Ponte feva salti trivelini,
Digando: Vegnì su, che qua se purga
Chi à in tel cao de pì sorte de vini.
Che femio? no vedeu ch'el tempo turga?
No se femo tratar da fantolini,
Demo un poco de spasso a ste brigae,
Gaveu paura de tre bastonae?

L

Varè, che da mia posta me le dago
In su le gambe, e no le stimo un figo:
Vu filè pur sotil sto vostro spago,
Co modo po se fussi in calche intrigo,
Co de quele che ponze più che l'ago.
Pota! mo vegnì su, fe' co ve digo,
E no ve fe', ve prego, pì aspetar,
O disè almanco, che no volè far.

LI

O se no se' de vogia, o se se' strachi
Andè qua in t'un trato al Magazen;
E chiucheghene cinque o sie bardachi;
Mi ghe n'ò, a dirve 'l vero, un bocal pien
In cao, ch'el no m'à tocao i mustachi,
E pì che prima de chiuchiar me vien;
El chiaro in corpo mete forza e cuor,
Vegnì su, Gnati, se me portè amor.

LII

Ah gali, ah gali, ghe respuose Taco;
No ve partì, sier Murga, aspetè un giozzo
Che ghe ne chiuchierè 'n altro bardaco
Che no ghe sarà drento aqua de pozzo.
Ti ti à sempre de cianze pien el saco;
Dal bogia esser me possa el naso mozzo
Se un solo Castelan no à più busìe
Ch'in tuti i Zughi no ghe xe magìe.

LIII

Su per balconi, fondamente, altane,
Se se rideva no ve digo gnente.
A veder ghe xe sempre certe lane,
Nobili e altri che sta a dar la mente.
Un tal avria la boca un par de spane;
In questo salta su un Gnato valente
Digando: A ti, sier Murga, sier fradelo,
Femo una bota ti e mi, presto e belo.

LIV

Murga responde: Mi no te cognosso,
Ti no se' da mio par giurde chiopec!
Se no ti vol che te rompa pì d'un osso,
E sul mustazzo aver Salamelec.
El Nicoloto: Mi ò nome Zan Rosso,
El dise, e no intendo sto bilic belec;
E tut'a un tempo de falso roverso
A Murga dete sul musa a traverso;

LV

Digando: Questa sarà el Turciman.
Murga romase una statua de piera
Quand'el sentì costù menar le man:
Putana, el dise, da la dolce ciera!
Mariol, traditor , gagiofo, can,
Ti no te partirà da questa fiera
Che te fracherò el naso, furfantazzo;
E la so' grigna se revolze al brazzo.

LVI

Zan Rosso gera in guarda de falcon,
E col baston stava sul ziogolar.
Costù de scrime xe più che gioton;
Murga s'à fato avanti per menar
A Rosso su la testa un stramazzon;
Rosso da banda a vodo el lassa andar,
E d'un mandreto ghe dè s'un garetolo
Che de la calza el ghe cavète el gretolo.

LVII

Se la è stà zusta no vel posso dir;
La è sta sentìa fina in Campaniel,
Tuti criava: Murga, va a dormir,
'E fa che to' Mare porta a san Daniel
Una statua per farte ben guarir.
Murga da stizza gera tuto fiel,
E la gambeta spesso alzava in erto
Perchè el sentiva una gran dogia certo.

LVIII

I Nicoloti feva la risagna
Con tuti quei che tien da la so' banda,
I Castelani da grinta i dei se magna
Perch'i vedeva in testa la zirlanda
A un pìa-cape, viso de lasagna.
In questo Giurco Ceola su manda
A dir a Murga, che per so' consegio
Vegnisse zoso. El vene per so' megio.

LIX

Vegnando zo l'andava zotegando
Co la gamba scachìa e un dente in pezzi.
I Gnati gh'andava con strior disando:
Ah, sbrichi magri, no valè sie bezzi!
Chi smacava bachete, e chi subiando;
Rosso diseva: Vegnì suso, nezzi,
A un per un, e do', come ve piase,
Se fazza avanti chi vol de le gnase.

LX

Cimera, Mirco, Giurco e Galineta
Tari e Monèlo, Bisato e Biscoto,
Rizzo, Biondo, el moroso de Leneta,
Nico, Zanchezzo, Giarcola e Piloto,
Polo-del-vechio, Tanagia e Bereta,
Lumaga, Ton, Vetola e Birioto,
Sier Pan-de-megio, Fugazza e Garzante,
Scoco, Schiavelo, Fiuba e Zan-dal-Zante,