La guerra de' Nicolotti e Castellani dell'anno 1521/2

XXI

Tuti criava: dai, dai, dai!
No fu mai vista la più bela zufa.
Sul Ponte gera Taco da un dei lai,
Che ve so dir ch'el cavava la mufa
Dai schinchi a certi sbrichi calefai,
Dei primati che gera in sta barufa.
Zonfeto a Tari tira d'un fendente
Sul muso che de boca ghe va un dente.

XXII

Tari per questo no l'andava zoso;
Ma co la vesta in cao se cazza soto,
Propio come faràve un can rabioso,
Tanto ch'a più d'un par l'à 'l muso roto;
De far vendeta el gera sì ansioso
Ch'el saltò zoso dal Ponte a pie zoto,
E tuti i so' compagni el seguitava;
E ve so dir che le man se menava!

XXIII

Gran rumor gera su la fondamenta;
Tuti criava: Tornè in drio, canagia;
In bagno ghe n'è andà fursi da trenta;
Nè fu mai vista la più bela bagia.
De questo Tari za no se contenta,
Ma a vose piena, come quei che sagia:
Ve la farò scontar, Gnati poltroni,
Fursi con altro un dì che con bastoni.

XXIV

In questo tempo Agresta, Tasso e Lilo
In cao la meza testa se fracava,
E per mostrar ch'i no gavesse filo
Contra dei Castelani se afrontava.
Certi, che fato avea come fa 'l grilo,
Fuora del buso la testa i cavava,
E tuti insieme per forza de legni
Fa i Castelani tornar ai so' segni.

XXV

Qua se sentiva tiche, tache, toche
Su i gomii, su i schinchi, su i zenochi,
E ve so dir che no le gera roche
Ma legni duri come xe batochi.
Tasso una ponta tira tra le coche
A Fiuba, ch'è salta co' fa i ranochi,
E tuto quanto d'angossa el suava;
Mai no fu vista una guera sì brava!

XXVI

Da ogni banda tuti stava a l'erta;
Se vedea bulegar de legni un fasso,
Tota in sto tempo à pià una smerta,
E corse zo del Ponte insin a basso;
Che ve so dir che l'à bu la so' oferta!
No s'a mai visto cussì bel fracasso;
I Gnati dal Ponte no podea avanzar
Che i Castelani i feva retirar.

XXVII

Tarlao, Daco , Ziron, Moreto e Sardo,
Bioco, Topo, Fisolo e Ganzara,
Ciascun de questi per far el gagiardo
s'à fato avanti per vederla chiara;
Sardo è sta 'l primo , e com'un liopardo
Salta sul Ponte e cigna e tira e para,
Talchè el pareva un lovo tra i agneli
Dagando ai Castelani i biscotèli;

XXVIII

No za de quei che vende i scaleteri.
Da l'altra banda Cimberle e Ceola,
Ognun più d'un lion gagiardi e fieri,
Pareva i tori quando i can se mola:
Incarir vogio stamigne e dopieri
Vegnìa criando, e t'una bota sola
Fursi farò più de do' Mare grame;
Vegnì, che tuti no vale' do' schiame.

XXIX

La zente al sentire sti bravazzi
Tuti ghe dava criando la smoca:
No fe', ve prego, cari sier caenazzi,
Andè a strupiar dei poli drio la chioca
O dei stornèli che se vende in mazzi.
Cimberle dise: Oh Dio, se la me chioca
Vegnerò zoso, e a che megio, megio,
Ghe ne darò fin a quei da Consegio.

XXX

E tut'a un tempo de trar fece vista
El legno a un certo che à tirà un petazzo.
Spinazzi in questo salta su la lista
Del Ponte, e dise: No far el bravazzo;
Chi tropo cianza poco onor aquista,
Nicola e ti, Gregheto e Caenazzo,
Mi e Bioco, Sardo e Mazorana
Femo una bota, e nessun no s'ingana.

XXXI

— Mi no cerco altro, ti m'invidi a pasto,
Cimberle dise; e d'un tozzo sul muso
Dete a Spinazzi senz'altro contrasto.
Vedendo questo, Sardo salta suso,
E anca Spinazzi con el naso guasto,
E no va in tanta furia un archibuso.
A Cimberle sul cao dete una crosta
Che al mustazzon assae caro ghe costa.

XXXII

Cimberle in tera casca in zenochion,
E se no gera Ceola che lo tene,
Zo del Ponte l'andava a tombolon.
Mariol, mi te farò portar le pene,
Dise Spinazzi, de quel mustazzon;
E anca Grinta a mezo 'l Ponte vene
Con baston d'una bona misura
Da far in prima angossa e po' paura.

XXXIII

Giarcola presto se fa incontro a Grinta
Con una ponta a la volta d'i denti,
Po' la seconda, terza, quarta e quinta
Grinta tirava de mati fendenti
Da no saldarse più con colaquinta:
Taco e Ziron criava mal contenti:
Femo fora sti Castelani impegolai
D'Albanesi e Schiavoni inzenerai.

XXXIV

I Castelani, sentindo sto strior,
Zan Calafao, Musega e Bisato
Salta sul Ponte con impeto e vigor
Bastonae dando da orbo e da mato.
No se vedea chi avesse la pesor,
Se no che, come un vento, Folegato
S'è cazza in mezo de quei Castelani
Menando a tuti bastonae da cani.

XXXV

E in manco che no se zira un timon
In bagno ghe n'è anda meza dozena;
Chi cascava, chi a forza de baston
Gaveva roto el naso e chi la schena;
Qua se vedeva chi gera poltron,
E da combater chi avea forza e lena;
Sul Ponte gera più de tre destesi
Che in leto i stete po' più de do' mesi.

XXXVI

Sier Ranco no dormiva gnanca esso,
Ma ve so dir ch'el le petava fisse,
E se calcun se gh'acostava apresso
Storzer li feva ch'i pareva bisse.
Più d'un cao lu gavea schiopà e fesso
E 'l so legno pareva ch'el pulisse!
Tanto presto el menava le zate
Ch'a piar sorzi nol fa gati nè gate.

XXXVII

In la pignata no bogie i fasioli
Come sul Ponte e Castelani e Gnati,
E anca Bragolani e Canaruoli;
Tuti pi destri pareva ch'i gati.
Garbo criava: Su, agiola, fioli,
Granzo, Franca-molèna feve avanti;
E tut'a un tempo corse infin da basso
Con Solfa e Ghiro fagando fracasso.

XXXVIII

I Castelani se meteva in fuga
E i Nicoloti ghe le dava tasse.
Ghiro disea: Una fogia de latuga
No stimo 'l mondo co son stà a le basse:
E cussi tut'insieme in t'una ruga
Su nomboli, su cope magre o grasse
Petava gnase, ve so dir, de cao
Da incarire Dialthia anca largao.

XXXIX

Stoco, Zorzeto, Tofalo e Fracassa,
Ochi-de-sepa, Giarcola e Schizzao,
Tuti sti sete s'a fato una massa
Per far de Nicoloti un mal mercao;
E ve so dir ch'i la tagiava grassa
Co le so' meze teste tuti in cao,
E i so' bastoni co le ponte aguzze
Postai sul Ponte per far scaramuzze.

XL

I Nicoloti, che no xe minchioni,
Massime Sete-nasi, Coca e Chiepa,
Sul Ponte i s'à fermà come turioni,
E a Coca e Scoco i dete su la crepa
Un fendente, digando: Babioni,
Credeu d'aver a far con calche zepa?
Ve le faremo contar nu de sta sorte:
Avanti vegna chi cerca la morte.