La guerra de' Nicolotti e Castellani dell'anno 1521/10

CLXXXI

Ghe ne restava zembai più de trenta,
Tra i altri Giurco stava molto mal,
Che dona Morte ghe dava la spenta
Per portarselo via senza feral.
De far sto viazo mo nol se contenta
Per esser tropo soto Carneval,
Nè goder el podea nei Magazeni
E rosti e lessi e carateli pieni.

CLXXXII

L'anema Giurco se sentiva insir,
Tut'i amici lo xe stai a visitar,
Fo subito el barbier fato vegnir
E con gran diligenzia miedegar;
Poco se spera ch'el possa guarir,
Che a poco a poco el se vede mancar,
Qua sora el tuto ghe fo recordao
Ch'el dieba perdonar a chi gh'à dao.

CLXXXIII

A questo Giurco subito respose:
Mi ghe perdono, brigae benedete,
E s'el trovasse con i pie in le buose,
E con le man ligae co le manete
Mi no l'ofenderìa; se con la vose
Sola podesse far le mie vendete
Nol voria far; anzi ve prego tuti,
Zoveni e vechi, garzonati e puti,

CLXXXIV

Che daspuo che la cossa sì xe fata,
Dio ghe perdona a chi xe sta cagion;
Fè che la pase sia tra vu refata,
E vivè come prima in union;
Feve piaser l'un co l'altro a regata,
Che questo è de l'amor el paragon;
Tanto che se stupissa le brigae
A veder in vu tanta caritae.

CLXXXV

No ve ostinè con dir, che i Nicoloti
Sia de vu più deserti o più poltroni,
Ch'anca tra i nostri ghe xe dei merloti;
E cussì d'essi che no xe minchioni.
Tuti a la fin no semio patrioti?
Cressui in sti campì, ste cale e cantoni?
Tuti semo stampai d'osse e de carne,
Niente dovemo più de altri avantarne.

CLXXXVI

No semio tuti de una Patria istessa;
Fioli de San Marco, e del so Stado?
Che Dio el mantegna, e fazza pur ch'el cressa,
Che 'l ben ch'avemo, lu ne l'à donado;
Però, fioli mii, no ve recressa
De far come che mì v'ò recordado:
Viver in pase, amarse da fradei,
E lassar star ste gare e sti bordei;

CLXXXVII

Altro no posso dir, che sento chiaro,
L'anema fuora del mio corpo salpa;
La gripia no se tien più gnente al faro.
In questo el fronte un co le man ghe palpa,
Che de suori el ghe n'aveva un caro,
Fredi più che no xe neve su l'Alpa;
E cussì Giurco con contrizion
Spirò sperando aver dal Ciel perdon.

CLXXXVIII

Parechi de zembai ghe ne restava
Che per no aver soldi da guarir
In Gheto topi e letiere impegnava.
Altro in Venezia no s'avea che dir,
Che de sta guera sì gagiarda e brava.
Gera un solazzo talvolta sentir
Certi mati ostinai e parziali
Che adosso i se saltava co fa i gali.

CLXXXIX

Un disea: I Castelani è pì valenti.
Quel altro: No, xe i Gnati e Canaruoli.
Quel respondeva: Per la gola menti,
Che vustu meter sti pìa-pessi-moli
Con quei che manzeràve azzal coi denti?
E cossì supiando pì che foli,
Spesso qualcun con scorozzoso zefo
Se rompera la testa, anche el sberlefo.

CXC

In fin perchè l'Arsenal no patisse,
Cussì de cape e pesse in Pescarìa,
E per meter la stanga a tante risse,
Da i Tribunali fo fata la cria:
Che de far pì la guera no se ardisse
Chi corer no volea per Merzerìa.
Dal filo in pase i stete per quel'ano;
El vero dito v'ò se no m'ingano.