La guerra de' Nicolotti e Castellani dell'anno 1521/1

I

O Marte, o Baco, o fradei zurai
D'Arme e del chiuchio tuti do' paroni,
Amici dei chiuchianti e dei sbisai,
Sul bocal e celada in zenochioni
Ve prego con i ochi al Ciel alzai
Donème grazia, cari compagnoni,
Che mi possa cantar le guere, i fati
De Castelani, Canaruoli e Gnati.

II

E ti de Marte Venere morosa,
Pregalo per so' amor ch'el sia contento
De far questa mia impresa vitoriosa.
No te vogio oferir oro nè arzento,
Che ben me trovo in sì pericolosa
Fortuna, e ò contra mar, tempesta e vento;
Pur spero col to agiuto el bel conforto
De salvo intrar co la mia barca in porto.

III

Per certe risse antighe de mil'ani
Ogn'ano se sol far una gran guera
De Nicoloti contra Castelani
Su ponti ora de legno, ora de piera;
A dar se vede bastonae da cani,
E chi cazzar in aqua e chi per tera
Con gambe rote e visi mastruzzai,
E qualcun de sta vita anca cavai.

IV

Come ve digo, siando quest'usanza,
Per mantegnir che no l'andasse in fumo
I Castelani feva una gran smanza;
Certi diseva: Pota! oh me consumo,
No vedo l'ora d'esser in sta danza
E in t'i zufi zufar de Gnati un grumo;
Rompergh'i denti, strupiargh'i zenochi
Trazerli in lenza po' come ranochi.

V

E cussì i Nicoloti d'altra parte
Voleva far broeto e zeladìa
De Castelani. Tuti feva el Marte
In Piazza, per Rialto, in Pescarìa
Mostrando aver de far la guera ogn'arte,
Inzegno, forza, cuor e vigorìa;
Ognun se feva bravo con parole;
Or suso ai fati, e lassèmo ste fole.

VI

Del mile cinquecento e vinti un
El di del squarta-vele San Simon
Ai Servi se reduse cadaun
Co la so' celadina e 'l so' baston
Per forse veder chi xe bianco o brun;
E che nissim no se gnanca minchion;
L'un pì de l'altro facendo el valent ;
Mostrando de stimar... bastonae? gnente.

VII

De barche gera tuto el Canal pien;
Per tera, su balconi, copi, altane
Tante xe le brigae che va che vien
Che no xe vodo per tera do' spane;
Chi da una banda , chi da l'altra tien,
Xe un rumor più che cento campane,
E po' in t'un trato bassi i sta là tuti
Pian pian digando: Vien altro che puti?

VIII

Qua sul Ponte dei Frati dei Servi
I primi a saltar su xe Tota e Giagia;
Questo d'azzal se poi dir ch'abia i nervi.
Zaleca Gnato per darghe la bagia
Ghe dise: Vu saltè che parè cervi,
Magnasseu mal cota una fortagia?
Tota, che a più cuor che no ga un drago,
Dise: Licheme el tondo quando cago.

IX

Responde el Nicoloto: El bassaneto
Te licherò con quela da sie branzi,
Magna-pegola, sbrico da un marcheto.
Giagia responde: Tasi ti, pìa-granzi,
Se ti no vol aver qualche bufeto,
E forsi un ochio fora, se ti cianzi.
- Sagurai, vegnì suso, dise Tota,
E femo a do' per do' un puoco 'na bota.

X

Galopa la so' celadina presto
S'a messo in cao senz'aspetar Zaleca,
Digando: Agiola su, mi son in sesto,
Ch'aspetemo? che sona la ribeca?
De bastonae ve n'o parechià un cesto,
Che ve so dir che le sarà de zeca;
Vòi romper teste, strupiar brazzi e coli
A più d'un par de sti pìa-caraguoli.

XI

E tut'a un tempo el vene a mezo ponte
In quatro salti ch'el pareva un gato,
Tirando col baston roversi e ponte.
Giagia ghe dise: Vien ti, Folegato,
Che con mio fra' Galopa vago a monte.
Pota de Dante! mi vogio far sto pato
Che se in tre bote mi no te sganasso
De farme Frate e andare col cao basso.

XII

Folegato responde: Sier cagozzo,
Se' vegnì su ve darò de le gnase;
Co chi credeu parlar, bareta a tozzo?
Che vu se' un puto e un frasca me despiase;
No me vorìa impazzar co chi è stà mozzo,
Da mi no gaverè mesure rase;
Se vegnì suso i denti e le massele
Ve romperò, e fursi le cervele.

XIII

- Mo ti te vogìo, Sior bulo da crenza,
Responde Gìagia: vien su che t'aspeto,
Che con un deo te vogio trar in lenza;
Camina, mato, non aver respeto
Se ti ti è stao cavalier a Vicenza,
Che qua se vederà sti à cuor in peto;
Inzegno e forza co' ti mostri in zefo,
Vien su, sti à vogia, che te rompa el sgnefo.

XIV

Folegato sbufava da gran stizza
E presto in cao el s'a messo la celada;
Come serpente a mezo el Ponte el sguizza,
Che tuti larga ghe feva la strada:
Te gratarò, digando pur, sta pizza;
E Giagia soto, e tira una stocada.
Folegato repara, e tut'a un boto
Tira un mandreto e ghe dà d'un corloto;

XV

E 'l dise: Sala da scalogne questa?
E va in t'un trato a la volta del muso.
A questo Giagia d'un roverso pesta,
Che se la targa no lo alzava suso
Quest'altra gera più garba che agresta;
Onde Giagia è resta tuto confuso,
Perchè del corlo la dogia ghe moonta,
E tuti cria: Desmonta, desmonta.

XVI

Mustachi presto per darghe socorso
Revolze intorno el brazzo la grignola,
E salta sora el Ponte co' fa un orso,
Criando: Avanti tuti, agiola, agiola;
Pota de Baco! no ve stimo un torso,
Fe' conto che xe zonto pan in tola:
Vien Folegato, che femo una bota
A un per un, e po' faremo frota.

XVII

Folegato, che xe bravo da fati,
No ghe responde pur una parola,
Ma col silenzio che sol far i Frati
Col legno cigna, tira, para e mola,
E in t'el più belo Folegato è ai ati,
E dà un fendente de su la ceola
A Mustachi, ch'è anda in tera stornìo
E zo del Ponte à fato un caorlo.

XVIII

Cimberle, Bio, Paton, Bao e Catachi
Gercola, Tari, Tatagio e Bisato.
Murga, Burga, Cimera, Giurco e Bachi
A l'assalto i vien tuti in t'un ato.
Za i se vedea a storzerse i mustachi,
E in mez'al Ponte i fava un gran sbarato.
I Nicoloti stava con timor
E i Castelani ghe dava strior.

XIX

Questo vedando Sardo e Zambalao
Guagni, Spinazzi, Topo e Mazorana,
Marmeo, Gazara, Liron e Tarlao,
Zonfeto corse zoso d'un'altana
Per essere anca esso in sto marcao;
Digando: Anca mi vogio de sta mana;
E qua tuti s'à messo a zogolar
Con gran gusto de chi stava a vardar.

XX

Roversi, ponte, montanti, fendenti,
Falsi, mandreti per gamba e per testa,
Se vedea romper teste, gambe, denti,
Su le celade pareva tempesta.
Qua se vedeva chi gera valenti,
E chi aveva la gamba e la man presta;
Chi a mezo Ponte cascava desteso ,
Butao in lenza anca calcun de peso.