Una dea del terzo cielo,
Vegnindo a spasso in tera,
S'avea degnà de amar un pastorelo,
E per quanto pol far
Una dea con un omo
La lo saveva amar.
Vu ve podè pensar
Qual fusse in sta aventura
El stato d'una povera creatura.
Infiamà,
Passionà,
L'avaressi osservà
Qualche volta avilio
Qualch'altra imatonio,
E gh'è sta dei mumenti
Che l'à credesto deventar un dio.
Povero barbagian!
Chi xe uman resta uman.
Sta dea, stante el deismo,
Viveva suso in cielo,
Ma la se fava veder
Anca dal pastorelo.
Un dì la dise: - «Puto,
Te voi felicitar,
E vogio che ti vegni
Doman co mi a disnar.»
Penseve l'alegrezza
Che in elo l'à provà!
Quel dì no l'a disnà,
Nè la sera cenà
Per farse onor co sta divinità.
Co le idee che 'l gaveva
El bon pastor credeva,
Che come i dei coi omeni
In tuto i ghe va avanti,
I magnasse da manzi o da elefanti.
Vien l'ora, e in certo sito,
Che la gaveva dito,
La lo stava a aspetar
E lu, senza falar
Un minuto secondo,
El trova là un palazzo
De quei che no gh'è al mondo.
Sta dea donca riceve
L'ogeto del so amor,
Come che de un Tabaro[1]
Farave un Senator,
Con un'aria ridente,
Ma che no è confidente,
Con espression de afeto,
Ma che vien da la testa e no dal peto,
E con un tal contegno,
Che de una dea xe veramente degno.
El nostro pastorelo
Sta là come un putelo,
El teme de parlar, de alzar i ochi,
E ghe trema i zenochi;
Ma el pensier lo ricrea
De magnar la manestra
Co la so cara dea.
Xe in tola. Oh che possae!
Che piati, che terine
Tute quante storiae!
Che parechio curioso!
Che deser delizioso!
Che vasche, che bei fiori!
E dai piati che odori
Che se fava sentir!
El pastor za scomenza a sgangolir.
La dea co le so man
Vol darghe da magnar al nostro uman;
Ma quando el mete in boca
Gnente el palà ghe toca,
Che d'una spezie d'etare ogni piato
A l'usanza divina gera fato.
El so gusto ghe gera,
Ma el palà del pastor, fato de tera,
No podeva sentir
I sali impercetibili
Che lo andava a ferir.
Pur el fa finta per riputazion
De magnar de quei cibi
Co tuta divozion,
Ma da la fame orenda
Za deventà rabioso
El lassa alfin sul piato
Ogni cibo prezioso.
La dea, che se ne acorze,
Dimanda al pastorelo,
Perchè nol magna quel che i magna in cielo
El se trova intrigà,
Risponderghe nol sa;
Ma pur incoragio
Dal titolo de amante,
El dise: Fia de un dio,
Me par che lo gavevi da saver
Che mi son tera, e che vu sè pensier;
E che dovevi, avendo da tratarme,
O umanizarve, opur divinizarme.»
Se no temesse, amici, de chiamarme
I castighi del cielo,
Co l'esempio del nostro pastorelo
Vorave ste divine consegiar
De farse venerar
O in prussission, o sora d'un altar;
Ma a no far la sempiada
De smorosar coi miseri mortali
No dandoghe che pranzi celestiali.
