La consolazion

Me vede malinconico
Catina l'altro dì
E la me dise: Trotolo,
Cossa mai gastu? E mi:

- Sapi, che Lila... - Lila?
Ti ghe vol ben ancora?
Va via sastu in malora. -
- No lo sastu anca ti? -

- Lo so, maledetissimo,
Ma ti l'à da scordar;
O va a l'inferno, o l'unica
Son che ti à da amar. -

- Sì, te amerò ti sola. -
- Mostro, te mazzarìa,
Sì, za l'è butà via,
Sì, l'è negà sto cuor;

Ma, curte, sta to cocola
La t'à savù impiantar. -
- Cossa? - Via presto, dimelo,
Che ti possi crepar: -

- L'à dito... - Fa 'l smorfioso...
Cossa? - Che la voria
Se no fusse omo... Via -
- La me vorave amar: -

- Marfisa gentilissima!
Che anema che la ga!
Oh povero el mio Trotolo
Ti fa giusto pecà!

Donca cussì i me toca?
Va là che ti è un gran tomo;
Te desfarò de omo
Cussì la te amarà.