La canson dela Primavera
From Wikisource
| La canson dela Primavera de Berto Barbarani 1900 |
| Informassion su la proveniensa del testo |
Primavera, ocieti grisi
come usertole sul muro,
gran busie che te me disi,
gran canaia che te sì...
Gh'è i putei che i vien çercandote,
ma ti, furba, te i confondi
e le viole te le scondi
per tegnertele par ti !
Primavera, così siora
così bianca, come feto
a levarte su bon'ora
co sto fresci a girondar?
Mi, camino sora i àlsari,
dove gh'è i osei che siga,
a insegnarghe con fadiga
la maniera de sgolar !
Primavera, come feto,
così bianca, così siora,
a levarte su dal leto
quando tuti i sta a dormir?
Mi, camino sora i àlsari
dove sbocia qualche fiora,
per giutarla a vegnèr fora,
par no vèdarla a patir!
Primavera, çento basi
te voi dar su la manina;
dirte quanto te me piasi,
proprio dirtelo non so...
Ma in campagna soto ai àlbari
che ne i fossi zo se specia,
«bisi, bisi» in te 'na recia,
primavera te 'l dirò...
Pian pianin che nissun senta,
voi contarte le passione,
che da un toco me tormenta,
che me lagrima sul cor...
E in campagna, soto ai àlbari,
tra i formenti ancora in fasse,
dimandarte quella passe
che me incanta sto dolor.
çercarò soto l'ombria
de le foie che se sveia,
çercarò la poesia
da indolçirme sto figà...
E scrivendose le lètare
sora ale de poeia,
pianteremo una fameia
su do pèrteghe de prà!
  |
This work might not be in the public domain outside the United States and should not be transferred to a Wikisource language subdomain that excludes pre-1923 works copyrighted at home. According to the copyright law of Italy this text will be in the public domain by January 1st 2016.
Veneto: Sto laoro el xe nel publico dominio nei Stati Uniti de la Merica parché el xe stà publicà la prima olta fora dai USA prima del 1° zenaro 1923. In altri stati podarìa essarghe dele leggi difarenti. Donca sto laoro el podarìa no essar mia nel publico dominio in Italia o altre nasion che no sia i USA.
Secondo la leje italiana sui diriti d'autor, sto testo el sarà de publico dominio a scuminsiar dal 1° zenaro 2016.
Italiano: Il presente lavoro si trova nel pubblico dominio negli Stati Uniti d'America, perché è stato inizialmente pubblicato fuori dagli USA prima del 1° gennaio 1923. In altri stati le leggi potrebbero essere diverse. Di conseguenza il presente lavoro potrebbe non trovarsi nel pubblico dominio in Italia o in altre nazioni diverse dagli USA.
In base alla legge italiana sul diritto d'autore, questo testo sarà di pubblico dominio a partire dal 1° gennaio 2016.
|
