La candela

Ghe diseva una dona al so moroso,
Che gera inamorà ma no fogoso:
No, no ti è quelo che ti geri un dì.
E lu: Sì, Nana, son l'istesso, sì. -
- No, che no ti è l'istesso;
Ma per cossa più spesso
No me vienstu a trovar?
Assae più s'à da amar.
Ma lu no replicava,
E la candela intanto el smocolava:
Nana, diseva: Ascolta,
Mo via badime, caro,
Ma cossa fastu? - Fazzo un po più chiaro.
E tanto l'à mocà,
Che a la fin la candela l'à stuà.
Za lo vedeva, à dito la so' bela,
Sior sempio, che stuevi la candela:
- Sì cara, come vu fe' de sto cuor,
Che per farlo più ardente
Stuzzegherè sin che stuerè l'amor.