La biondina in gondoleta
From Wikisource
| La biondina in gondoleta de Anton Maria Lamberti musica de Johann Simon Mayr |
La biondina in gondoleta
l’altra sera gò menà;
dal piasser la povareta
la s’ha in boto indormensà.
La dormiva su ‘sto brasso,
mì ogni tanto la svegiava,
mì ogni tanto la svegiava.
E la barca che ninava,
la tornava a indormensar,
e la barca che ninava
la tornava a indormensar.
Contemplando fisso fisso
le fatesse del mio ben,
quel musetto cussì slisso,
que la bocca e quel bel sen!
Mi sentivo dentro al petto,
una smania, un missiamento,
una smania, un missiamento.
Una specie de tormento
che non so come spiegar,
una specie de tormento
che non so come spiegar!
M'ò stufà, oh finalmente,
de sto tanto so dormir,
e gò fato da insolente,
no m' 'ò vudo da pentir!
Perchè, Oddio, che bee cose
ghe go dito e ghe go fato,
ghe go dito e ghe go fato.
No, mai più tanto beato
ai me zorni no so stà.
No, mai più tanto beato
ai me zorni no so stà.
