La barchetta
From Wikisource
| La barchetta de Pietro Buratti musica de Reynaldo Hahn (1901) |
| Informassion su la proveniensa del testo |
Canzoncina per musica
La note xe bela,
Fa presto, Nineta,
Andemo in barcheta
I freschi a chiapar.
Che gusto contarsela
Soleti in Laguna,
E al chiaro de Luna
Sentirse a vogar!
A Toni go dito
Che 'l felze el ne cava
Per goder sta bava
Che supia dal mar.
Ti pol de la ventola
Far senza, mia cara,
Che i zefiri a gara
Te vol sventolar!
Se gh'è tra de lori
Chi tropo indiscreto
Volesse dal peto
El velo strapar,
O chi sul zenochio,
Le alete formando,
Magior contrabando
VOlesse tentar,
No bada a ste frotole,
Soleti nu semo,
E Toni el so remo
L'è atento a menar.
Nol varda, nol sente,
L'è un omo de stuco,
Da gonzo, da cuco
A tempo el sa far.
