La Momoleta

Vardè la in quel Campièlo,
Cara siora Prudenza benedeta,
Chi xe quela siorazza spetenada
Che fa tuti quei sesti, e che ramina
Con quel ninarse e quel bocon de mina.
— La me par, se no falo, Momoleta.
— Sì, sì, Momoleta, quela fia
De misser Zacaria
Che cerca, gramo, soto el Capitèlo
Tuto sgionfo le gambe e pien de mal,
E che un dì finirà za a l'Ospeal.
Varè, se Dio v'agiuta, mo no fala
Propio stomego e rabia con quel far?
L'è tal qual, da sioreta; con quei nei,
Con quel ninarse, co quel cotolin,
E tuta bianca come un calalin.
Varè; un che ghe fa i sberlefi,
L'altro che ghe varda drio; tuti ghe dise
Quel che po za so mi;
Anzi quel ch'i gh'à dito l'altro dì.
Varè là el Frutariol, varè là el Gua;
Che tuti do' se fa le mile crose
Che la vaga el davanti cussì nua,
Uh povera petazza!
Uh povera petegola monzùa!
Povera sporca, povera frascona;
E se mi fusse un omo
Ghe voràve dir quel che finisse in ona:

No la par più la gramazza
Che una volta se vedeva
Sbrindolosa andar per Piazza
A cercar la carità.
Chi diria che la xe quela
Che quel dì che la viveva
De polenta e de sardela
Gera gran solenità?

Epur xe vero, epur no le xe fiabe,
Tute l'à cognossua, tute saveva
Cossa che la magnava e la beveva;
E adesso? adesso la xe una Damòna,
La xe più che lustrissima; la magna
Sempre boca che vustu,
E la va a spasso, e la vive d'intrada,
E la lassa che diga la Contrada.
La ga le zelosìe
Depente verdoline
Co i so' cussinoni
Butai fora ogni zorno dai balconi.
Drento in casa, gran rasi,
Gran camera fornia,
E gran camise che se supia via.
Ve dirò questa, che una volta sola
Ghe n'ò cusio do'...
Quanto sarà Tomasa?... sto Fevrer,
Nè mai più ghe ne cuso;
La voleva butarmele in tel muso.
Apena la le à viste, l'à ma dito:
Siora Tomasa, m'avè mal servìo,
Nè queste xe camise da par mio;
Varè che cusiùre!
E che rebatidure!
Spua fora ste pietìne;
No sta ben ti scoeti,
I va come una bissa sti gazeti.

A sentir ste bagatele
Via l'ò trate tute do',
Una a Mestre, una a Malghera;
Po gh'ò dito a verta ciera
De so' Nona nina nana;
Chi l'à fata e chi la xe.

Ma no gh'è caso no, la xe cussì,
Custìa ga fato sto bocon d'umor
Dopo che la ga perso l'onor.
Za parlo chiaro, perchè so che tuta
La Ruga sa che no la ze più puta;
Sentì, Comare, el digo, no per mal,
Digo quel che m'à dito el sior Moleca
Che xe un omo... Che cade! el so gran mal
Xe stada quela striga de so' mare
Che ghe filava el lazzo,
E che ancora, sta vechia carampana;
La ghe fa mo da serva e da rufiana.

Xe che ò un poco de giudizio
E no vogio ancuo parlar,
Perchè mai quel bruto vizio
No go buo de mormorar.

Epur quela frascheta no xe bela,
Ca' de Diana de dia,
E l'à dito anca un dì dona Maria.
Ben la xe nata co la camiseta
Perchè la ga trovà
Quel panimbruo che se gh'à incapricià.
La xe longa e sotila che la par
Tramada a un fil de vento e de caligo;
La dopera, per farse molesina,
Una certa manteca de castrà
Che ghe lassa un odor che tuti sente
Chi che passa, o se ghe senta arente;
La xe un bezzo de asse,
Un soldo de formagio o de saon;
Una roca impontìa, un canachion;
La se rada i mustachi,
La ga le carne come le lasagne;
I peti tuti pori,
Cariolai de solo e sora maluguali,
E fiapi più dei vostri e più dei mii;
El dreto è grando quanto xe un melon;
El zanco è picoleto come un pomo;
Dirè come ch'el so? da un Zentilomo.
De soto, semo senza carne adosso,
E i omeni vol polpa e no vol osso.

Che sesto! che ciera !
Che naso! che vita!
Che denti! che boca!
Che brazzi! che man!

Sarave seguro
Quel Sior, se anca sola
Per Piazza la andasse
Infin a doman.

Ma pazienza, Sorela,
Che no la fusse bela,
Basterìa che la fusse
Manco afetada; perchè a l'ocasion
La zura sempre: Da quela che son;
E quando che i ghe cava el capèlo
La fa la boca streta,
E la ghe dise: Serva,
Con quel esse sutilo, che la par
Giusto un schizzeto al cul co l'è a sbrufar,
Se i ghe dà del tabaco
La lo tiol prima in ponta de piron,
Po la ghe supia via tuto quel poco
Che resta tacà ai dei,
Come che porta de le volte el caso;
Per no imbratarse, Dio se guarda, el naso;
E in ultima la finisse, o la stranua
Per dirghe un'altra volta: Serva sua.

Benchè ò le cotole
Però credèmelo,
No conto frotole
Ma verità;

E se parlessimo
Fin ancuo quindese
No ariveressimo
A la metà.

Savè che go do' Pute
Che no ze gnanca brute,
Ma che no xe per imaginazion
De la natura de sta zente da bon.
Una xe Venturina
Che fa la Colarina,
E che con quele benedete man
Fa dì e note fature al Sior Piovan.
Questa ga sempre la so' pignatèla
Calda, e co drento de la cola assae,
Perchè la serve de le gran Casae;
La ga verto botega, e drento e fora
Ghe va volentierissima la zente
Perchè i sa che la xe Puta prudente.
L'altra xe Vica, e la xe un bel seston,
Un toco de biancona;
Ma che so' Siora Santola Barbiera
Vorave farla andar per Cameriera;
Ma no vogio securo
Perchè so che in ste case
(E ve lo pol ben dire mio Compare)
Che ne toca a provar sempre de amare;
Bisogna che le fazza quei mestieri
E quele stente che no xe da Pute;
Bisogna che le sia sorde, orbe e mute,
Assae furbe, e che le tegna
In stomego da cento bisinèle
Che se le palesasse ghe anderia
Mi no so cossa, oltre el cazzarle via.
Ma, Sorela, quel che più me despiase
Xe che spesso e spessissimo le fala
O per gnente, o per poco
Co quei servitorazzi sfondradoni,
Che al strenzer de le strope
Tuti i gran petoloni salta fora,
E i scampa a l'improviso e i va in malora;
E in fin quele gramazze,
Strazzae de sora e rovinae de soto,
Le ve torna po' a casa col fagoto.

Cussì no fusselo
Per quela zovene
Che so po' mi;
E no gavessela
Da recordarselo
E note e dì!

E cussì, per ste cosse,
Vica vogio con mi; e se quel Sior
Che vien per casa nostra, e che xe fio
Del primo mercanton de Marzerìa,
Ghe dà per carità tuto el bisogno,
E ghe manda ogni zorno el pan e 'l vin,
No gh'è malizia, nè secondo fin;
E se lasso che i vaga, povereti,
Soli in Piazza e ai Casoti el Carneval,
Mi son secura che no ghe xe mal;
E se ghe tira dreto el so negozio,
Come gramo lu spera,
Chi sa che un dì nol ghe meta anca la vera!
Comare, per parlar de ste mie fie
Squasi mi son andada
Fora de carizada,
Nè v'ò conta de quela sporca el megio
Ch'i ga fato una volta in Canaregio;
Ma se volè saver tuta l'istoria
Sin dal principio al fin, col con e 'l ron,
Ve menarò doman Siora Vitoria.
Vago intanto da basso, che ò sentìo
A sonar Nona, e aspeto mio mario.

Questi xe i Pater nostri, e le Corone
De ste maledetissime Donète.
Ma, care le mie Done benedete,
(Parlo co quele che xe nate ben)
Credemelo dasseno,
Che de sto parlar beco cornù
Ghe n'è che se deleta anca fra vu.

Xe pur vechio quanto un sasso
Quel Proverbio che ne dise:
Varda, tasi e no parlar.

Godè pur, andè, stè, fè,
Ma lassè che tuti fazza
Tuto quelo che ghe par.