In occasione della guerra di Cipro

Se ti è vero Signor
De Cipro, come fio
De Venere regina descazzà
Perchè lassistu, Amor,
Ch'un nemigo de Dio
T'abia tolto el to' regno e rovinà?
Perchè no vastu là
Con i so' inamorai?
Lassa star l'altra zente,
Menaghe solamente
Tre o quatro mile grami desperai,
Che se ti fa cussì
Ti recuperi Cipro el primo dì.

Meti insieme un'armada ,
Che quando ti t'inzegni
Ti sa' pur fabricar nave e galle!
Senz'altra lanza o spada
Un solo dei to' legni
È bon da conquistar sete Turchie.
Co le man e coi pie
Te vegnirà a agiutar
Fin i poveri pessi;
Che ti pol sora essi,
Sora le Ninfe e sora 'l Dio del mar;
Quantunque za deboto
Sultan Selim t'à fato cagar soto.

Se to' Mare è nassua
In mar (co' se rasona),
Ti no pol dubitar de cosa alcuna.
Se ben l'è descazua,
La sarà almanco bona
De farte navegar senza fortuna;
E po' el Sol e la Luna
Con tuti i elementi
Te torà a favorir;
Ch'i te sol obedir,
E a ti obedisse tuti quanti i venti;
Che co l'Amor i toca
No i xe boni più d'avrir la boca.

Forsi che ti à fadiga,
Per andar ben armà,
De butar tut'el mondo soto sora?
Eh se sa senza che 'l diga
Che un solo inamorà
Tira in qua in là do mile frezze a l'ora.
L'artiglierìa laora
Con spessissimi tiri;
El tirar el fià in suso
Serve per archibuso,
E xe tante bombarde i so' sospiri,
L'à po' la corda e 'l fogo
Che dura sempre e ch'arde in ogni logo.

Resolvite, de grazia,
Resolvite in t'un trato,
E va de longo alegramente via;
Ma, fame un' altra grazia,
Che sia tra nu sto pato:
Se ti pii Famagosta e Nicosìa
Dàle a la Signorìa^[1]
Con tut'el so paese,
Omeni, done e 'l resto.
Tuti (come xe onesto)
Sarà po' toi; ti ghe farà la spese,
Che chi a l'Amor intorno
Vive d'Amor con do' marcheti al zorno.

Chi sa, Canzon, ch'Amor no sia
d'acordo co 'l Turco, che se vede
Ch'i è cani tuti do' privi de fede.

1. ↑ Oviamente par Signoria se intende la Republica de Venexia.