Il Maggio
From Wikisource
| Il Maggio de Pietro Buratti |
| Informassion su la proveniensa del testo |
Canzonetta per musica
Caro sto Magio!
Senti Nineta
Che bavesela!
Varda che erbeta!
Varda, putela,
Che bei colori
Sporze sti fiori!
No par che i diga,
Sentite qua?
Donca sentemose,
E qua soleti,
Come do fioli,
Tuti i secreti
De i russignoli
Ziti ascoltemo,
Che impareremo
Cosse che el mondo
Certo no sa!
Nina, indovina
Quel che i ne dise?
Che l'amor vero
Col fa raise
In cuor sincero
No l'è beato
Co solo afato
Nol se riduse
Con chi el vol lu.
Donca, adio mondo;
Bela Nineta,
Tra sti pastori
Femo caseta,
Sunemo i fiori,
Stemo qua soli
CO i russignoli
Che i la sa longa
Megio de nu.
