Idolo del mio cuor

Idolo del mio cuor,
Ardo per vu d'amor,
E sempre, o mia speranza,
Se avanza - el mio penar.
Vorria spiegar, o cara,
La mia passion amara;
Ma un certo no so che...
No so, se m'intendè,
Fa che non so parlar.
Quando lontana sè,
Quando no me vedè,
Vorria, senza parlarve,
Spiegarve - el mio dolor;
Ma co ve son arente,
No son più bon da gnente.
Un certo no so che...
No so, se m'intendè,
Me fa serrar el cuor.
Se in viso me vardè,
Fursi cognosserè
Quel barbaro tormento,
Che sento - in tel mio sen.
Dissimular vorria
La cruda pena mia;
Ma un certo no so che...
No so, se m'intendè,
Ve dise: el te vol ben.
Mio primo amor vu se,
E l'ultimo sarè,
E se ho da maridarme,
Sposarme - vôi con vu;
Ma, cara, femo presto..
Vorave dir el resto,
Ma un certo no so che...
No so, se m'intendè,
No vuol che diga più.
Peno la notte e el di
Per vu sempre cussì.
Sta pena (se ho da dirla)
Soffrirla - più no so.
Donca, per remediarla,
Cara, convien che parla:
Ma un certo no so che...
No so, se m'intendè,
Fa che parlar no so.
Sento che dise amor:
Lassa sto to rossor,
E spiega quel tormento,
Che drento - in cuor ti gh'ha.
Ma se a parlar me provo,
Parole più no trovo,
E un certo no so che...
No so, se m'intendè,
Pur troppo m'ha incantà.