I sorbeti

Dimandando a un cortesan,
Che ogni cossa ga per man,
Che nei afari de sto mondo
El procura andar al fondo,
La rason perchè l'Amor
Tante forme el sapia tor;
Ma in un modo, che capir
Nol se pol, nè defenir,
Sento a dirme: Vegnì qua
Al Cafè de la Realtà,
Un sorbeto beverè
E l'Amor cognoscerè. —
— Vado, el dise: Cossa gh'è? —
— I risponde: — Framboè,
Cedro, Ribes, Maraschin,
Moscatela, Canelin,
De la Vissola, del Persego,
Del Farsìdo, de la Fragola: —
— Basta; Fragola, disemo,
E bevemo;
E bevendo el dise lu:
Caro vu,
Sti sorbeti che xe stai
Dal regazzo nominai,
Xeli ogn'uno diferente? —
— Che dimanda? nol se sente? —
Sì, ma el corpo, o per dir megio,
Quela cossa che i sostenta,
Che deventa
La so essenza, in conclusion,
Cossa xela? — L'è el Limon. —
— Ben, l'Amor xe vanità,
Xe interesse, xe pietà,
L'è amicizia, platonismo,
Tenerezza, magnetismo;
Ma l'essenza, in conclusion,
Xela altro che limon?
Son restà come un minchion.