I progetti di matrimonio

De maridarme m'è saltà el caprizio;
Go diversi partii, ma vòi pensar:
Una vechia farìa da vomitar,
La zovene sarìa senza giudizio,

La bela piaserà a Sempronio a Tizio,
Con una bruta no me vòi tacar,
Pretenderà una rica comandar,
Me manda una pitoca in precipizio,

La nobile sarà superba e altiera,
Asena l'ordenaria e l'ignorante,
E la Dona sapiente una braghiera.

Donca chi ogio da tor tra quele tante
Che proposte me vien? Questa è la vera:
Vòi mandarle in malora tute quante.