Glamataployeg dilekela kadema bevünetik vpa

From Wikisource
Jump to navigation Jump to search

Dilekel kadema bevünetik vpa (u äs sagobs ba ya velätikumo: akademi intrnacional de mondolingu) ebitopom kademe ployegi pelevoböl kudiko glamata in zülags 15 e 16. Jen at binom tu veütik, al no pabepükön pato. Balüdo mütobs sepükön gäli obsik dö baivögam gletik, keli ekanobs ya ‚konstatön‛ in tefs mödik bevü at e glamataployegs lautelas vapükasitas votik, sobido pesubumoms yufü vöds bevünetik, ab no pelubleföl u pemeköl nesevlik in mod sembal äs in vp, sodas egetobs suadi, das i in püns valik votik balam okanom parivön nefikulo. Spad smalik bleda obsik no dälom liedo obes, debükön ployegi lölik u i te sezüki ota. Nefikulumo ka dub stud ployega it ogeton ya magi zaik püka füdik, dub pened sembal, pepüböl su flan telid zülaga 15 e pepenöl fa dilekel ya segun ployeg omik. Debükobs omi diso e lägivobs al feleigam lovepoli vpk.


Jfi[1] dilekel sagom finü zülag 16, das valikos binos te ployeg e das bisiadom kme ployegi glamata no demü vögodam, ab te al jonön, das km kanom fovön vobis vödabukavik in lüod jünuik, o. b. sevälön i fovo stämis ut as gudikün, kels patuvoms as vöds netik u as foginavöds in gleplüks[2] yulopik mödikün, efe i nu somikis, beginöl ko vokal a. s. adres (ladet), mutos binön nu klülik i plo blelogälikün, das km no fovo dasteifom te menodami vpa jleyerik, sod püki löliko difik de at. Klu vpan alik omutom cödätön suno, va vilom yufön kademi e nindukami püka, kel pejafom yufü tugedikos glepükes yulopik u vpi segun segivot Vid vödabuka popüböl suno, keli ab flens sägo gudikün datuvela vpa no jinoms vilön lensumön.


Tefü vobs fovoik kadema spelobs, das pofovoms desnu vifikumo e in mod umo nolavik ka jünu, äs atos pedemanos ya fa vapükans votik. Zu sepükobs vipi das dilekel mobom kme al xämam e lensumam balüdo vödis zesüdik plo geb kösömik e plo vobs it kma, dat km kanom melakön sunüno in pük lönik oka (ba büfuiko segun glamataployeg dilekela) kapälnik i vapükaflenes no sevöl vpi. Klud fovoik livama de vp binomöv, das km no dasteifom fovo te menodami vödabuka jleyerik defik e no ninöl vödis mödik vemo kösömik, sod gebom ba plo vobs fovoik sembali vödabukas kösömik netapükik. No dotobs täno, das kadem egetom suno läsevi lölik, yufi e kovobami vapükaflenas mödikün votik, kels dilo beginoms ya nu nilön ome.


Bepükam kuladikum e krüt yegik vobas kma fa vapükans stanöl plö kadem kanomöv binön te pofüdik plo mostep plöpik vobas kma. Sikod pidobs vemo, das bled no sibinom ya nu, me kel galmataployeg kanom pabitopön zilakes veitikum. Ye bi vpans e i vapükaflens votik so mödik vipoms ziliküno gasedi somik, klödobs kanön zelado pömetön pübami sunik somika ifi no foviko in glet begino peployegöl e luumo in vp ka in püks pesevik vapükazüpeles mödikün pato deutapüko e mögiküno suno in pük füdik it.



NOETS. (Vükifonät)

  1. Bükapök; pla: Ifi.
  2. Bükapök; pla: glepüks.




Se Volapük: Gased al pakam Volapüka 1895, Nüm: 9, Pads: 1-2.