El zensamin

Zensamin, de far bravate
No so vederghe el perchè;
Star in mezzo a un sen de late,
No lo nego, l'è un gran che;

Ma le rose e i amaranti
Xe stai là, li ò visti mi,
E un onor concesso a tanti
Xelo onor? dimelo ti?

Zensamin, te vedo a ciera,
Un sovran ti è deventà;
Varda ben che avanti sera
Sto sovran no sia fischià.

Farse gloria al dì d'ancuo
Che una dona v'ama! oibò;
Caro ti, l'è amor a fruo,
E ancuo l'ama, e doman no.

Fufignà, vedistu, in tera
Quel garofolo ch'è là?
Quel garofolo ger sera
Come un dio l'è sta adorà;

Nè invocar Flora e Priapo
No ghe val; nè dir: «oimè,
Lila mia, per ti son fìapo,»
Che pietà per lu no gh'è.

Benchè ancuo ti sii l'eleto,
Ti avarà per sucessor,
Chi lo sa, zensamineto?
Forse ancuo de zuca un fior;

Che nel regno d'incostanza
Gh'è cucagna, credi a mi:
Tuti ga la so speranza,
Se no un zorno, un altro dì.