El zarlatan (Giovanni Battista Bada)

Ghe gera un zarlatan che nel contar
Istorie dei so viagi avea el difeto,
De falope grandissime sbarar,
Che gnanca no se trova in Riciardeto;

L'à pensa de volerse moderar,
Ordinando al so servo per sto ogeto,
Che quando el lo sentisse a esagerar
Ghe tirasse el gaban; onde in efeto

Disendo un dì d'aver trova un lion
Che gaveva una coa longa tre mia,
El servitor ga dà presto un tiron;

E lu à calà d'un mio, e andando via
Un tirando, un calando, in conclusion,
Che l'era senza coa ghe sovegnia.

Sto tiron ghe voria,

Amigo, anca per vu quando parlè,
Perchè altro mai che slape no contè.