El zarlatan (Camillo Nalin)

Aurelio Setespente padoan
Se spassava per chimico proveto,
Ma gera invece un dreto,
Un zarlatan,
De quei che va zirando
Nel torbido pescando,
E cerca un fià a la volta
De cucar drento in rede
I gonzi che li ascolta,
I gnochi che ghe crede,
Ancuo co un piano fato,
Doman co un ritrovato,
Adesso co un progeto,
Deboto co un secreto,
Vivendo da rondoni
De contrada in contrada
A spale dei minchioni
Che ghe abada.

Dopo sto sior Aurelio de aver tanto
Per el mondo zirà co qualche impianto,
El s'à pensà costù
De andar nel gran Perù,
Che alora gera un stato
Indipendente afato,
Credendo che ghe sia facilità
De scaldarghe la zuca a so maestà,
Nela suposizion
Che quel regnante
Gavesse del melon,
Fusse ignorante,
Perchè quel trono nel'età rimote
Pareva destinà per le marmote,
Quando, per raro caso,
El gera un omo che gaveva naso.

Fermo nel so progeto,
Per poderse l'efeto
Assicurar,
El se fa proclamar
Per el paese
Monsiù de Setespan,
Un chimico franzese,
Portà in palma de mati
Dai doti principali,
E da famegie agiate
De le più rinomate
Capitali,
Per aver co la massima pazienza,
Consumando del soo squasi un tesoro,
Trovà la bela scienza
De far l'oro;
E per darse più ton,
Per più inganar,
Sto toco de bufon
Se fa anunziar
Per qualche setimana
Con apositi avisi, e nei giornali,
In lingua peruviana
A letere moderne e cubitali,
Come qua se faria
Per i milioni d'una loteria.

Tira fora do tomi
De letere e diplomi,
De ampolosi atestati,
De elogi sperticati,
De patenti,
Che co gran impostura
Va via mostrando come documenti
De la so inarivabile bravura;
E quando po ghe par
De poder calcolar
Co fondamento,
Che gabia dapertuta la cità
La fama circolà
Del so talento,
Con una longa istanza
Da cavadenti espressa
A so maestà ghe avanza
La domanda acioché ghe sia concessa
Sui rediti del stato
Una suma, un compenso,
In premio del so imenso
Ritrovato.

Ma quel regnante alora,
Dopo aver pensà sora
Sul modo de poderse regolar,
Un dì lo fa chiamar,
E co se ghe presenta
Sto furbo zarlatan
El ghe dise — la senta,
Monsiù de Setespan,
Za che Dio benedeto
Per trato singolar de so bontà
Ga infuso un inteleto,
La soma abilità
De far col so lavoro
Gnentemanco che l'oro,
Ela beato,
In sta borsa che voda ghe presento
Co la l'à fato
La lo meta drento;
E perché po la possa
Procurar se 'l conforto
Ch'anca in altri paesi i la conossa
Ghe dago el passaporto
Gratis, vol dir per gnente,
E la prego a partir subitamente,
Avendo anca disposto che ghe sia
Per boni fini
Qualchedun che ghe fassa compagnia
Sin ai confini. —

Se chi vive de trapole, de ingani,
Trovasse dapertuto sta acolgenza,
Se podaria sperar dei zarlani
Che andasse persa sina la semenza.