Nina, dov'è quei tempi
Che in barca da tragheto,
Su l'ora del frescheto
Se andava a scorsizzar?
Che sol de le to grazie,
Del to bon far vestia,
Ti davi gelosia
A qualche dea del mar?
Dov'è quei dì beati
Che un marendin bastava,
Che ambrosia el deventava
Solo da ti tocà?
Che in mezzo al to matezzo,
Donandote a l'amante,
Ti 'l favi in un istante
Felice ed inganà?
No ranghi, no tesori,
Te dava alora el cielo,
Ma el fresco, el bon, el belo,
E un cuor inzucarà;
E morbinosa l'anima,
E ochieto biseghin,
Sen d'alabastro fin
Sul torno lavorà.
Co tante grazie adesso,
Fresca, matona e bela,
Chi furba e baronzela
No aveva a deventar?
Ti 'l geri, o caro ogeto,
E Amor, me lo perdona,
Furba cussì e barona
Più te saveva amar.
Quanto è diversa, oh Dio
Degnissima signora,
Sta vita che ve onora
Da quei beati dì!
Quel omo grando e grosso
Che fè a la porta star,
L'imagine el me par
Giusto del tempo e mi;
Par che da vu el descazzi
Co quel so bruto viso
Piaceri, amori e riso,
Che nol li vogia più.
In fati, quei puteli
Mati, insolenti e -schieti,
Sui richi vostri leti
Trema de montar su.
Oh Dio! me li ricordo,
Vegnui per el balcon,
Sentarse a cufolon
Su quel to letesin;
E far mile matezzi,
E ti scherzar con lori,
Riso, piaceri, amori,
Pianzè 'l vostro destin.
No, quei tapei, signora,
Tessui per man d'Aracne,
Nè quei che le persiane
Ga ordio co le so man,
Nè quela vostra tanto
Superba arzentaria,
I piati co maestria
Incisi da German;[1]
Quei vostri gabineti
Fati a vernise fina,
Che l'arte de la China
Ariva a suparar;
I vasi giaponesi,
Le chichere del Vezzi,[2]
E quei tanti altri pezzi
Che usè de doparar;
Quel padiglion magnifico
Che alzè co se in campagna,
Dove no sol se magna
Al fresco i dì d'istà,
Ma che s'impianta spesso
Soni, festini e canti,
E tuto quel che incanti
Dal mondo vien chiamà;
Le zoge che avè al colo,
Le bucole, i rechini,
E le perle e i rubini
Che ai brazzi vu portè,
Le franze, i fiochi, i merli,
E tanti bei ricami,
Le stofe e quei pelami
Che a casse conservè,
In soma tuta quela
Pompa che dea ve rende
Ai ochi che no intende
La vera volutà,
Perdona, cara Nina,
No condanarme e tasi,
No val un per de basi
De la to prima età.
