El tropo e 'l tropo poco

Ne la stagion dei bocoli,
Sul tramontar del dì,
Sentai soto una pergola
Gerimo Nina, e mi;

Mai più l'aveva vista
Quanto in quel zorno bela;
Fisso mi gera in ela
Disendoghe cussì:

«Quel che ti fa, mia cocola,

Xe tropo per scherzar,

Ma tropo poco, nonola,

Quando ti vogi amar.

Quele ochiadine tenere
Che co le mie se vien,
Fa che 'l mio cuor s'imagini
De bisegarte in sen,

Ma de sto dolce ad onta
Parlar, che 'l cuor me toca
Oh dio! che la to boca
Co quele no convien.

«Quel che ti fa, mia cocola,

Xe tropo per scherzar,

Ma tropo poco, nonola,

Quando ti vogi amar.

Se voi scazzar da l'anima
Quel fogo che sofrir
M'à fato tanti spasemi,
Ti ti me 'l sa proibir,

Ma se te digo, cara,
Sentistu in tel to peto
Per mi l'istesso afeto?
No ti me lo vol dir.

«Quel che ti fa, mia cocola,

Xe tropo per scherzar,

Ma tropo poco, nonola,

Quando ti vogi amar.

Su quele neve candide
Se sbrissa la mia man,
Neve che fa ardentissime
Un dio per mi tiran,

No trovo che se opona
La toa su quel mumento,
Ma da là un poco sento
Cazzarmela lontan.

«Quel che ti fa, mia cocola,

Xe tropo per scherzar,

Ma tropo poco, nonola,

Quando ti vogi amar.

Qualche coral dai laveri,
È vero, t'ò robà,
E ti compassionandome,
Robar ti l'à lassà;

Ma no ghe xe stà esempio
Che da to posta mai
Un de quei bei corai
Ti m'abi regalà.

«Quel che ti fa, mia cocola,

Xe tropo per scherzar,

Ma tropo poco, nonola,

Quando ti vogi amar.

Ah! Nina, se deciderse
No vol per mi el to cuor,
Vien qua, piutosto mazzime,
Termina el mio dolor;

Daghe sto premio, ingrata,
A Toni che te adora,
Fa che con elo mora
El più costante amor.

Decidi, cara cocola,
Se ti me vol burlar,
O se xe vero, nonola,
Che ti me vogi amar.»

Pietoso el fio de Venere
Alora s'à mostrà,
E in t'una bela nuvola
Insieme el n'à sarà.

No so se fusse al mondo,
O pur da quel diviso,
Ma so che un paradiso
Gnente de più no ga.

E ò dito: «La mia cocola,
Questo no xe scherzar,
L'è far da seno, nonola,
Questo xe vero amar. —

— Si, co un soriso amabile,
Ma insieme anca baron,
La dise: mi no dubito,
L'è amor, ti ga rason;

Ma el to vantar, perdona,
Fa che la to Nineta
Sul muso te ripeta
L'istessa to canzon.

Quel che ti à fato, cocolo,
Xe tropo per scherzar,
Ma tropo poco, nonolo,
Quando ti vogi amar.»