El ricordo

Sia benedeto el zorno
Che mi t'ò visto, o Nina,
E che de mi vicina
Cara ti t'à sentà.

Me lo ricordo ancora,
Sempre me par, ben mio,
Che no sia mai spario
Quel benedeto dì.

Ti geri ben vestia,
Vestia come da festa,
E ti gavevi in testa
Un bocolo d'amor;

Ma in sen come sul trono
Te stava quel fioreto,
Che simbolo xe schieto
De la semplicità.

Quel zensamin, Nineta,
Vardandolo m'à dito;
No stago qua in sto sito
Senza el mio gran perchè.

La Nina m'à prescielto
Fra mile e mile fiori,
Perchè mi piu de lori
Somegio al so bel cuor.