El proponimento
From Wikisource
| El proponimento de Anton Maria Lamberti XVIII secolo |
| Informassion su la proveniensa del testo |
Xe vero, ti stuzzeghi
Nol posso negar,
Ti è caro, ti è cocolo,
Ti sa bisegar;
Ma sento in te l'anima
Ancora el brusor;
No vogio più spasemi,
No vogio più amor.
Che colù xè un baronato,
E so mi quel che 'l m'à fato,
Nè se ga più pase in sen.
Sta quieto... via cavite...
Che corpo ustinà!
No serve... via lassime,
O vado de là.
Sior no; no go laveri...
Sior no; no go man:...
Sta quieto, o te morsego.
Va via, mato can.
Che colù xè un baronato,
E so mi quel che 'l m'à fato,
Nè se ga più pase in sen.
Per dia, vado in colera:
Oh dio! che anemal!...
No no, caro Giacomo,
No fanne del mal.
Che mostro del diavolo!...
No posso sofrir...
Che gusti da barbaro!
Me sento a morir.
Ah! ti xe el gran baronato.
Ah! de mi coss'astu fato,
Che go tanto fogo in sen?
