El profito de l'amor

Dopo tanto navegar,
Dopo tanto travagiar,
In quel mar,
Che va tanti a naufragar,
Grazie al cielo ò tirà in tera
Grasso in ton de bona ciera.
No go bele, no go brute,
No go done, no go pute,
No go amanti,
Nè galanti,
Nè fiozzete,
O pupilete,
Nè siorete,
O comarete.

Dei gran trafeghi che ò fato
No me resta gnente afato,
So ridoto povareto
Da comprarme el mio fasseto
Per scaldarme,
E consolarme
Sul giudizio che ò salvà,
Su la vita, che ò campà.
Eco quelo, amici cari,
Che in sti mari,
Quando pur la vada ben,
Eco quelo che se otien.