El papagà (Giovanni Battista Bada)

Gaveva un papagà
Una dona comprà,
E questo ghe servia
De distrazion qualche ora e compagnia.

Col tempo gera bon
La lo tegnia al balcon,
E ripeter la ghe fava
Quele parole che la ghe insegnava.

Un medico passava
In quelo che insegnava
Al picolo animal
Parole, giusto el solito, sta tal.

Ti è beco, ghe disea
La dona; e ripetea,
Ti è beco, el papagà:
E 'l medico a sentirlo s'è ferma,

Vedendo ela el dotor
Fermà, ridea de cuor,
Pensando che 'l credesse,
Che a lu el so papagà, beco disesse.

El medico mo acorto,
De questo s'è inacorto,
E co le quiete alora
Ga dito francamente a la signora;

Parona, vu ridè,
Ma no savè 'l perchè
Beco el me diga; ond'eco
A dirve mi perchè 'l me chiama beco;

El tien elo in pensier
Che vu siè mia muger.
Co sta so bizzaria
L'à tratada el dotor da buzevia.

Qualche volta è pungente
Anca el scherzo inocente.