El nom de dieu velh comensar

please do not remove empty parameters (see the template documentation).

El nom de dieu velh comensar by [[Author:{{{author}}}|{{{author}}}]]

(ca) Poema de 1374 sobre la infància de Jesús.

¹El nom de dieu velh comensar,
Quem lays dire et acabar,
Que sia ad honor et a lauzor
De Jhesu Crist nostre senhor
⁵E que vos plassa de l'aurir
So qu'ieu vos vuelh contar e dir
Del filh de dieu, cant era enfans
E non avia mai cinc ans.
El fon gentils et amoros,
¹⁰Bel e cortes et gracios,
El font humils et font plazens
Et agradans a totas gens.
Sa perssona ac ben formada
E la cara gen fayssonada,
¹⁵Los huelhs amoros e plarens,
La boca fresca e rizens.
Totz sels que l' effan regard(a)van,
Paucs e grans, s' en enamoravan.
Ganren juzieus aqui avian,
²⁰L' enfan Jhesus non conoyssian,
A las gens els van demandan
De qui era aquel effan.
Respondo sels quel conoissan:
Filhs de Jozep, veus bel effan.
²⁵Totz aneron fort regardan
E a cascun gran gaug fazia.
Tant grant beutat l' effan avia.

Senhers, aras vos velh comtar
L' enfant Jhesus que anet far
³⁰E entendes ben la razo
Que fes aitant co effant fo,
Ni com to(r)t dia il anava;
Am los jhuzieus s' asolassava,
Amb els anava et venia,
³⁵Car eron de sa companhia.
Ar aurires que anet faire
L' enfant Jhesus franc de bon aire.
Un bon mati secretamen
Aitant co pot rescostamen
⁴⁰De nostra dona se panet,
A l' escola mager anet,
Ont ac doctors e clerx onratz,
Nobles (e) rix et appoderatz,
Et ancian en teuletgia,
⁴⁵En logica, en gromancia
Et en ganre d' autra siens(i)a.
L' enfant Jhsesus senes temensa
Denant les maistres s' en venc.
Pueys l' effant Jhesus mantenent
⁵⁰Davant els s' anet asetar.
A els se pren a desputar,
L' effant lur moc grans questios,
Ganre d' articles e de razos.
Totz si van fort meravilhar,
⁵⁵Cant auriront l' effan parlar.
Negu respondre no sabia
Et ero maistre et theuletgia.
Demantenent tots s' en aneron,
De gran vergonha qu' els agueron,
⁶⁰Cant viron que aquel effant
Era tan jove que saupes tant.
Del linhatge de nostra dona
Estavan en aquela escola.
Cant auriron l' effant parlar
⁶⁵Mot s' aneron tots aleg(r)ar.
Devant Jozep s' en van venir,
Anero li pregar e dir
E a nostra dona issament,
La pregueron mot coralment;
⁷⁰Vostre effant faits essenhar,
Letras appenre et endotrinar;
Car si l' effant viu longamen,
Fort sera savi e sabent.
Per el serem trastotz onratz
⁷⁵E son linhatge issausatz.
E Jozep a lur re(spo)ndut:
Senhors, dis el, si dieus m' ajut,
Ieu ai plazer et gaug mot gran
De so quem dizes del effant.
⁸⁰E los parens de nostra dona
Responderon en aquela hora:
Senher, Jozep, metam l' effan
Am lo maistre Arian,
Car per sert en aquesta terra
⁸⁵Milher maistre non qual querre.
El es hom gentils et onratz,
Non enten en negu baratz.
E Jozep tantost a resport:
Senher, dis el, a me plas fort.
⁹⁰D' aqui se parton e jausen
E nostra dona issamen.
L' effant Jhesus i ameneron,
Ad Arian lo prezenteron.
Pueis van li dire e pregar,
⁹⁵Que l' effant volgues essenhar,
Letras appenre et endoctrinar.
Car nos vos mot ben pagarem
E vestra volontat farem.
Et Arian a respondut:
¹⁰⁰Senher, dis el, si dieus m' ajut,
Aissi vos prometi en dieu
Qu'ieu l' essenhe, co s' era mieu.
L' effant ad Arian laisseron,
Jozep el amix li pregeron
¹⁰⁵E nostra dona eissamen
Lur vai pregar mot humilment,
Que l' effant per mal non toques
Ni lo feris ni lo bates.
Et Arian a re(spo)ndut:
¹¹⁰Senher, dis el, si dieus m' ajut,
L' effant no sera ja tocat,
Batut, ferit ni malmenat.
L' effant ad Arian laisseron,
Nostra dona els amix (s' en) aneron.
¹¹⁵Pueis Arian l' effant sonet,
Decosta se el l' assetet
E volc li sa leisso mostrar.
Arian vai li demandar:
Mon effant, ar digas aleph
¹²⁰Et en apres tu diras beph.
E l'effan non a mot sonat,
Et Arian fo fort irat,
L' effant anet ferir sul col.
Jhesu li dis: fag as que fol.
¹²⁵Et aitantost demantenen
Vesent de trastota la gent
Et Arian tantost tombet,
Veren de totz mortz s' estendet.
Tots sels que en l' escola ero,
¹³⁰Grans meravilhas se doneron,
Per la vila s' en van cridan:
Mortz es lo maistre Arian!
Un bon juzieu que aquo auzi,
Tantost corren d' aqui parti.
¹³⁵Secretament ven a Jozep:
Senher Jozep, sabes queus prec,
Que von anes tost a l' escola,
E no fassas longa demora.
Vostre filh so maistre a mort.
¹⁴⁰Senher Jozep, anatz hi tost.
E Jozep tantost mantenent
Ades de tres, ades corrent,
Dreg a l' esquola s' en anet,
L' effant Jhesus aqui trobet.
¹⁴⁵Mantenent per la man lo pren
Ves l' ostal e pueis menet l' en.
Car Jozep gran paor avia,
Qu' om li agues fag vilania.
Et aitantost demantenent
¹⁵⁰Vengros los amix els parens
Davan e foron mot irat
Com l' an vist el sol degolat.
Mot fon grant lo dol que meneron,
Cant Arian mort atroberon.
¹⁵⁵Els juzieus aneron parlant:
Aisso a fag per sert l' effant,
Filh de Jozep et de Maria.
Per qu' ieu per sert cosselharia
Davant lo senescalc anem,
¹⁶⁰E pueis cant devant el serem
Nos li contarem lo dampnatge,
La mort, la perdoa e l' otrage
Que nos a fag Jhesus l' effant
De nostra parent Arian.
¹⁶⁵Totz respondon: mot ben dizes,
Anem hi tug assems ades.
D' aqui sen van tantost partir,
Al senescalc s' en van venir
E aneron lo saludar.
¹⁷⁰Pueis van li dire et pregar:
Senher, vulhas nos escotar.
El senescalc demantenent:
Senher, dis el, ardidament
Digas so que dire volres,
¹⁷⁵Car mot ben entendutz seres.
E parlet un savi juzieu:
Sen senescalc, no vos sia greu.
Nos autres ves denonsian
Lo prozom maistre Arian.
¹⁸⁰L' effant Jhesus, senher, l' a mort,
Par queus pregam, senher, que tost
Vos nom fassas dreg e razon.
Aquo vos querem, autre non.
Et senescalc a respondut:
¹⁸⁵Senher, dis el, si dieus m' ajut,
Ieu vos farai razo e dreg.
Mais per la fe que non vos deg,
Vos autres aves pron parlat
Et ieu vuelh esser efformat,
¹⁹⁰Abans que ieu al re ly fassa.
Par quieu vos priec que nous desplassa,
Dis lo senescalc, sabes que fares?
Lo mort denan me portares,
Car ieu volray vezer lo mort.
¹⁹⁵Tug respondon: a nos plai fort.
Los parens del mort s' en aneron,
Devant lo senescalc l' aporteron.
El senescalc lo mort regardet,
Pueis als amix el demandet:
²⁰⁰Qual dizes vos qu' aquest a mortz?
Qu' ieu non li veg nafra ni colp,
Ni veg qu' el aja perdut sanc.
A gran tort encolpas l' effant.
El pot esser mort d' autramens,
²⁰⁵Com moron ganren d' autras gens.
Per sert, l' effan non a ges (de) tort,
D' aquest fag ieu l' escuzi fort.
El senescalc pueis va lur dir:
Senher, dis el, voles aurir.
²¹⁰Ieu per sert acosselharia,
Si conoisses que be fag sia,
D' aquest fag non vulhas parlar,
Mais portas lo mort soterar.
Vos autres sabes que l' effan
²¹⁵Es de parage noble e grant,
Del linhatge del rey Davit,
De Jesse, d' Abram atressi.
Per que per sert (mal) vos venria,
Si al effant hom mal fazia.
²²⁰Cant los pare(n)s del mort an aurit
So quel senescalc del effant a dig,
De gran paor van s' en anar,
Porteron lo mort soterrar.

Apres aisso pueis s' endevent,
²²⁵Un senher de bon estament
Qu 'era gentils homs de parage,
Noble home de grant linhatge,
Senher era de gran nobleza
Et avia mot gran riqueza,
²³⁰Maistre era en teuletgia,
En las artz, en nigromanssia
E non (a)via ges d' effant.
E un jorn el s' anet pessant
Com pogra aver Jhesus l' effant.
²³⁵Davant Jozep s' en es vengutz,
Anet li dire et pregar,
Que l' effant li volgues laissar.
E Jozep li a respondut:
Senher maistre, si dieus m' ajut,
²⁴⁰L' effant per re non laissaria,
A negun home qu' el mon sia.
Car ieu non o aurava faire,
Si non o sabia sa maire.
E lo maistre respondet:
²⁴⁵Ben podes far, senher Jozep,
Qu' ieu vos prometi be en dieu
Qu' ieu l' essenhe cosi era mieu.
E Jozep adonx li va dir:
Senher maistre, voles aurir,
²⁵⁰Ben me plas que vos l' essenher,
Man qu' assa maire ho demandes.
Car ieu non lo vos laissaria
Per nulha re que el mon sia.
E lo maistre respondet;
²⁵⁵Ieu vos prege, senher Jozep,
Que vos et ieu, senher, anem
A sa maire e quel pregem,
Que l' effant me vuelha laissar;
Car ieu lo vuelh endotrinar.
²⁶⁰E Jozep adonx a respost:
Senher, dis el, a me plai fort.
D' aqui s' en van abdos partir,
A nostra dona van venir,
E(l) maistre la saludet,
²⁶⁵E pueis apres el li preget
Que l' effant li volgues laissar:
Car ieu lo velh endotrinar,
Si a vos, (dona), ni a Jozep plages
Que laissar l' effant volguesses.
²⁷⁰E nostra dona respondet:
Voles ho, bon senher Jozep?
E Jozep tantost a respost:
Dona, dis el, a me plai fort.
L' effant al maistre lesseron.
²⁷⁵Nostra dona et Jozep li pregeron
Que l' effant no vuelha tocar,
Batre, ferir ne malmenar.
E lo maistre respondet:
A vos, dona, et a Jozep
²⁸⁰Vos promete per re que sia,
L' effant per mal totar no sia,
Ant vos dic qu' ieu l' amarai mai far
Cent plazer, que un mal estar.
Lo maistre l' effant ne menet,
²⁸⁵Mot lo servit et mot l' amet;
Car l' effant era amoros,
Bel e cortes e gracios.
L' effant era mot ben noiritz
Et de trastotz (bos) aips complitz.
²⁹⁰Cant lo maistre l' effant vezia,
Ades mai de gaug li fazia.
Pueis lo maystre l' effant sonet,
De costa se el l' asetet,
E volc li sa lesson mostrar.
²⁹⁵El maistre val demandar:
Mon effant, ar digas aleph
Et en apres tu diras beph.
L' effant Jhesus li respondet:
Per que aleph enans que beph?
³⁰⁰Tu aquest mostre en teuletgia,
En las artz, en nigromanssia.
Respon me a las questios,
Car ieu te demande razos.
Digas me que vol dire aleph,
³⁰⁵ieu te diray que vol dire beph.
Cant lo maistre a aurit
So que l' effant Jhesus a dig,
Mot fort s' anet meravilhar,
Cant el aurit l' effant parlar.
³¹⁰Tantost et el s' agenollet
Et al effant merce clamet:
Senher, dis el, pardona me,
Eu ai falhit encontra te,
Car ieu, senher, mot fort errava
³¹⁵Car lo meu maistre ensenhava.
E s' ieu, senher, ai re falhit
Encontra te ni fag ni dig,
Prec vos, senher, me perdones
Per la bontat que e vos es.
³²⁰Ieu cresi tu iest hom e deu,
Rey essenher, lo mon es tieu.
Adonx respon l' effant Jhesus:
Ieu vuelh, car tu m' as conogut,
Arian sia ressucitatz
³²⁵E de mort a vide tornatz.
Pueis lo maistre humilmen
De bon cor e devotamen
Mantenent vai s' agenolhar.
Et a l' effant merce clamar.
³³⁰L' effant Jhesus li pardonet,
Car de bon cor mercel clamet.

Pueys s' estalvet un autre dia,
Jhesus am d' antra companhia
S' anavan essems deportar
³³⁵Foras la vila solassar.
Dis un gran hostal s' en intrero
Trastug essem aissi co ero.
El solelh dis l' ostal rajet
Per la fenestra vont intret.
³⁴⁰Jhesus vai sul solelh pojar
E par dessus corre e sautar,
E pueis se mes de cavalgos,
E vengrols autres inz unatos
E pessero faire a(i)tal.
³⁴⁵E viras los aqui tombar
Les us sobre l' autre cazer,
Que no se podian tener.
Los us s' eron trencat los caps,
Los autres les cambas els bras,
³⁵⁰L' autres s' eran trencat el col
Qu' estavan mortz e mieg del sol.
Aqui s' ajusteron grans gens,
Paires et maires e parens,
Mot font grans lo dol que meneron
³⁵⁵Car lus effans mortz atroberon.
Totz crido: catius! que farem
Ni qual cosselh penre poirem?
E no farian mais plorar
E van sus lo solelh regardar
³⁶⁰E veront hi l' effant Jhesus,
E gran meravelhas at cascus,
Cant l' an vist sul solelh estar.
Tot respondo: be poiria far.
E parlet un prozom juzieu:
³⁶⁵Senher, dis el(s), no vos sia greu.
Per sert ieu acosselharia
Si conoisses que be fat sia,
D' aquest fag non anes parlant,
Car per sert de Jhesus l' effant
³⁷⁰Non trobarem dreg ni razo,
De la valenssa d' un boto,
Mais c' a Jozep nos non anem,
Apres cant denant li serem,
Contarem li lo mal el dan
³⁷⁵Que nos a fag lo sieu effant.
Tot respondo: mot be dizes,
Anem lay donx tantost ades.
D' aqui s' en van tantost partir,
Davant Jozep s' en van venir;
³⁸⁰Et aneron lo saludar,
Pueis van li dire et contar
La perdoa el dampnatge gran
Que lur a fag Jhesus l' effan.
E Jozep a lur respondut:
³⁸⁵Senher, dis el, si dieus m'ajut,
A me non plas en lunha re,
Si l' effant vos a fag mai be.
Mais si vos plas me menares
Lai em dires que l' effant es.
³⁹⁰Et els re(spo)ndo mantenen:
Senher, mot volentieiramen.
D' aqui s' en van tantost partir,
Lai vont es Jhesus van venir
E volgrol a Jozep mostrar;
³⁹⁵Anc negu non pot mot sonnar.
La vista el parlar perderon
Trastotz essem aissi co eron,
Septat Josep que aqui istet,
A l' effant humielment sonet.
⁴⁰⁰El effant font obedient,
E aitantost demantenent
Del solelh aval el sautet,
Et es vengutz denant Jozep.
Tot se van fort meravilhar,
⁴⁰⁵Cant lo viron aval sautar.
Ar aurires pueis c' anet faire
L' effant Jhesus plen de bon ayre.
Les effans que eron tombatz
Del solelh aval degolatz
⁴¹⁰L' effant Jhesus lur vai sonar
E apres va lur comandar
Que se levesson mantenent,
Vezen del pobol e de la gen.
Los mors foro resucitatz
⁴¹⁵Els naffrats gueritz et sanatz.

Ar m' entendes et aurires
L' effant Jhesus pueyssas que fes.
Un bon mati se vai levar
E vol s' en anar deportar
⁴²⁰Foras la vila en la ribiera
E passet pr una teulieira,
Ont avia ganre d' ubriers
Que farian teules e porchiers.
L' effant aqui s' arestanquet,
⁴²⁵L' obra que farian regardet
Pueis l' effant volc lur ajudar;
El teulier vai li demandar:
Digas, effant, de qui es vos
Que tant es bel e gracios?
⁴³⁰Vos non es pas d' aquels mestiers
Que fassa teules ni pechiers.
Ieu cre que sias gentil effant,
La cara n' aves el samblan.
Vos me semblas de gran linhatge
⁴³⁵E de mot noble parentatge.
Prec vos, mon effant, von tornes.
L' effant respont: no farai ges.
L' effant am los obriers estet,
Tro fon gran nueg, lur ajudet.
⁴⁴⁰A lo teulier era semblant
C' amb els obres Jhesus l' effant.
Al effant nulla re non dero
Ni de manjar nel convideron.
Vespre font, volgro s' en anar,
⁴⁴⁵Car era ora d' albergar.
L' obra c' an facha regarderon,
Trastotz fort(z) se meravilheron,
Cant viron tanta d' obre facha,
E font mot gentilmens obrada.
⁴⁵⁰Mai n' agro fag en aquel dia
Que de cinc jorn(s) fag non avia.
Pueis lo prozom teulier va dir
A seis obriers: bem meravilh
Aquel effant ont es anat
⁴⁵⁵Quey tot jorn nos a ajudat.
Dis lo maistre: gran falhensa
Avem fag e desconoissensa,
Qu' a l' effant non avem re dat
Ne que ferem gran malvestat.
⁴⁶⁰Negu de totz re non li dem
Ni de manjar nel convidem.
Respondo totz: sol que trobem,
Entre tos ben lo pagarem.
D' aqui se van tantost partir,
⁴⁶⁵Vas lur hostal s' en van venir
Am gran gaug et ab alegratge,
Car aviam fag tan bel obrage.
L' effant Jhesus font remazutz
A la teuliera rescondutz.
⁴⁷⁰E cant s' en foront totz anatz,
L' effant Jhesus qu' era remas
Tota l' obra que fach' avian,
Ben quatre jorn o cinc avia,
Ola ni teule ni pechier,
⁴⁷⁵Ren non a remarut entier.
L' effant Jhesus tot atrenquet,
Demantenent el s' en anet
Ves son hostal tant co podia.
E Jozep son effant querie,
⁴⁸⁰E car era vespre tan gran,
Gran paor avia de l' effan,
Car non lo podia trobar.
Jozep no faria mai plorar
E dis: catiu! e que faray?
⁴⁸⁵Aquest effan on trobaray?
Cant Jozep at pro l' effant sercat
E fun ben las e trabelhat,
El vic l' effant que s' en venia
Ves son hostal tant co podia.
⁴⁹⁰E Jozep tantost l'effan pren
Per la ma et pueis menet l' en.
E nostra dona, cant vit Jozep
El effant que am se menet,
Ela at plazer e gaug mot gran,
⁴⁹⁵Cant sent vengutz son car effant.
Pueis nostra dona humilment
Li demandet mot dossamen:
Mon effant, vont aves estat
De tan gran nueg? si as albergat,
⁵⁰⁰Ieu vos priec que no m' o seles.
L' effant respondet: no faray ges.
Uey mati ieu me vau levar
E volg i anar deportar
Tras la vila en la ribieira,
⁵⁰⁵E passey per una teulieira,
Ont avie ganre d' obriers
Que farian teules e pichiers.
Pueis nostra dona val demandar:
Mon effan, volrias vos pauzar?
⁵¹⁰L' effan respont: menjar volria.
Huey ne mangey de tot lo dia.
E nostra dona a respondut:
Mon effan, be son mal astruc
Sels a qui aves huey ajudat,
⁵¹⁵Que lunha ren nous ajon dat.
Jhesus respon: res no me deron
Ni de mangar nom convideron.
L' effant Jhesus vet e manget;
Cant a manjat pauzar s' anet.
⁵²⁰E lo prozom de la teulieira
Lo bo mati tent sa carreira,
A la teulieira s' en anet,
Ganre d' obriers am se menet.
L' obra pesset aver trobada
⁵²⁵Entieira com l' avia laissada,
Et vit que res noy at entier,
Ola ni teule ni pechier.
El teulier cridet: que faray,
Ni qual cosselh penre poiray?
⁵³⁰E qui m' a donat tal dampnatge
Que m' aje trencat mon obratge?
Qu ' ieu non li pessa aver tort.
Mai me valgra quem agues mort.
Lo teulier estet corrossat
⁵³⁵E font mot dolent et irat,
Cant vic tota l' obra affolada,
Aissi delida ni malmenada.
Pueis lo prozom teulier va dir
A sos obriers: voles aurir?
⁵⁴⁰L' effant que hier nos ajudet,
Per so car ren hom nol donet,
Sapjas que ieu vau fort doptan
Que n' aga fag a quel effant.
Tot respondon: far se poria;
⁵⁴⁵Nos ferem mot gran vilania
Qu' a l' effant non ajam re dat,
De que ferem gran malvestat.
Per que per sert es be razo
L' effan nos redda gazardo.
⁵⁵⁰Car l' effan es de gran sabenssa
Ne re affar non a temenssa.
Effan fassa o mal o be,
El no pessa falhir en re.
Dizam l' effan fag o agues,
⁵⁵⁵Lun tems amenda non aures.
E parlet un savi juzi(e)u:
Senher, dis el, no vos sia greu;
Per sert ieu acosselharia
Si conoisses que be fag sia,
⁵⁶⁰Davant Jozep nos non anem
E pueis apres li contarem
La perdoa el dampnatge gran
Que nos a fag lo sieu effan.
Tug respondo: mot ben dizes;
⁵⁶⁵Maistre, anem hy ades.
D' aqui s' en van tantost partir,
Davant Jozep s' en van venir,
Et anero lo saludar,
E Jozep elos atrestal.
⁵⁷⁰Dis Jozep: senher, que dizes?
Senher, no(s) te direm addes.
Jozep tantost s' anet pessan:
Calqu' esquern lur a fag l' effan.
Pueis lo prozom teulier va dir:
⁵⁷⁵Senher Jozep, voles aurir.
Ton filh Jhesus venc entre nos,
A la teulieira adjudet nos
L' effan de bona volontat,
Volontiers nos a ajudat.
⁵⁸⁰Mais pueis nos ho a car vendut,
De l'obra non a remazut,
Olas ni teules ni pichier,
Res noy a remazut entier.
Pueis Jozep al teulier va dir:
⁵⁸⁵Maistre, fort me meravilh,
Si nostre effan vos a trencada
Vostra obra ni affolada.
E lo teulier a respondut:
Senher Jozep, si dieus m' ajut,
⁵⁹⁰Sapjas que ieu non ho diria
Per lunha re que el mon sia.
Dis Jozep al teulier: anem
A la teulieira e veirem,
(S') aquela obra ha trencada
⁵⁹⁵L' effan Jhesus ni affolada.
Tots respondo: mot volontiers.
Dis Jozep: metes vos premiers.
D' aqui s' en van tantost partir,
A la teulieira van venir,
⁶⁰⁰La obra volgro a Jozep mostrar,
El teulier anet regardar
Et estet e trestos vergonhos
E font per ser meravilhos,
Cant el vic l' obra ben formada,
⁶⁰⁵Ben cuecha e ben apparelhada,
Olas e teules e pechiers,
Trastot o troberon entier.
Dis Jozep: senher, que voles,
Pus vostra obra entieira aves?
⁶¹⁰Vos autres semblas truffados,
Barataires, (o) escarnidos,
Quem agas fag venir vessar
Ni tant luenh venir trabelhar.
Mot aves fag gran vilania,
⁶¹⁵Qu' ieu (non) puesc anar a magistria.
Respondet lo prozom teulier:
Senher Jozep, merces vos quier.
Prec vos que vos me pardones
Per la bondat que en vos es.
⁶²⁰Respon Jozep: pardon vos dieus,
Car el o pot mielhs far que ieu.
Lo teulier va d' aqui partir,
Ves son hostal s' en va venir,
E tug sos obriers issamen
⁶²⁵D' aqui partiron o van s' en,
Am gran gaug et ab alegrage,
Car accabatz font lur obratge.

Estalvet se un autre dia,
Jhesus am d' autra companhia
⁶³⁰S' en vengro essems deportar
E vant aut en un mur pojar.
Jhesus hi poget tot premier
Et aprop el pojet Ferrier
Et Abramon venc pueis apres
⁶³⁵E Jussifon e Samuel.
Pueis venc Crestas e Salamon,
E Caracanza e Mosson,
Et Aconet es pueis pujat
E Vidalo e Bonizat,
⁶⁴⁰Jacop et Aron e Bonet,
E Davino et Astruguet,
Pueis venc Bondia et Josse
E Barbasanta et Moisse,
E Ricoinet et Salamias
⁶⁴⁵E Malestot e Zaquarias
E d' autres n' i ac gran re mais:
Duranto, Salmonet e Mordacais
E Bevengut e Dieu-lo-sal,
Minoret hi font atrestal,
⁶⁵⁰(E) Cartengut e Veginon
E Camonet e Bonizon.
Totz essems van sul mont pujar,
Comessero a solassar.
E cant foron essems laissus,
⁶⁵⁵Ferrier, un garso malastrug,
Anet Abramon degolar
Del mur aval lo col trencar.
Com lo inatos o an vist
Tot s' en fogon sal Jhesu Crist,
⁶⁶⁰Qu 'es remazutz el mur laissus.
Los parens del mort so vengutz
A las gens els van demandan:
Sabras qui a mort aquel effan?
Un malvais juziu anet dir:
⁶⁶⁵Senher, dis el, voles aurir?
Digas que me voles donar,
S' ieu lo vos vau tantost mostrar.
Els responderon mantenent:
Mostra lo nos, pron ti darem.
⁶⁷⁰Dis lo juziu: ar me segues,
Qu' ieu lous mostre tantost ades.
D' aqui s' en van tantost partir,
Lai ont est Jhesus van venir,
El juziu vai (lur) l' effan mostrar
⁶⁷⁵Vezes lo sus lo mur estar.
Els parens del mor van dizen:
Senher, digas e que farem?
L' effant que sus el mur vezes,
Cascu per sert creire podes,
⁶⁸⁰Que aquel es l' effan Jhesus.
E si vos plagues a cascus,
Que a Jozep non anessem
Et pueis apres li comtessem,
Com ha Abramon degolat
⁶⁸⁵Del mur aval, le col trencat.
Tot respondo: mot ben dizes,
Anem lai tug essems ades.
D' aqui s' en van tantost partir,
Davant Jozep s' en van venir.
⁶⁹⁰Mot dossamen lo saluderon.
Jozep (va) vai dire que quere(ron).
Senher, nos te volem pregar,
Ton effan vuelhas castiar,
Car per sert mot es grant l' otrage
⁶⁹⁵Que nos a fag e lo dampnage.
E Jozep respon ab aitan:
Que nos a fag nostre effan?
Totz los parens del mort van dir:
Senher Jozep, voles aurir?
⁷⁰⁰El nos a mort e degolat
Abramon, filh de Bonizat.
E Jozep a lur respondut:
Senher, dis el, si dius m' ajut,
A me non plas en lunha re,
⁷⁰⁵Si l' effan vos a fag mai be;
Mai si vos plas que me menes
Lai ont dires que l' effant es.
Tot responderon mantenent:
Senher, mot volentieiramen.
⁷¹⁰Dis Jozep: metes vos premiers.
Els respondo: mot volentiers.
D' aqui s' en van tantost partir,
La ont est Jhesus van venir,
E van lo a Jozep mostrar.
⁷¹⁵E Jozep vai lo regardar
E vie lo que sul mur estet.
Et Jozep tantost li sonet:
Mon effant, dis el, davalas
D' aquel mur aval, si vos plas.
⁷²⁰El effant Jhesus mantenent,
Veren del pobol et de la gent,
Del mur aval l' effan sautet
Et es vengutz davant Jozep.
Els mavais jusieus van diren:
⁷²⁵Per sert so es encantamen.
Los falsses jusieus mestresian
So que l' effan Jhesus faria.
Los amix et parens del mort
L' effan Jhesus encolpo fort.
⁷³⁰Tut diron qu' el l' a degolat
Del mur aval, lo col trencat.
E Jhesus als juzius va dir:
Ben aves talent de mentir;
Qu' ieu ant Agramon non toquey
⁷³⁵Nil diey enpencha nil botiey.
E si creire non m' en voles,
Anas al mort e li dizes
Si ieu l' ai mort ni degolat,
Ni lai del mur aval tombat.
⁷⁴⁰Et un malvais jusieu felon,
Enic e de mala razon,
Lo qual avia hom Jacob,
A respondut come arlot:
Vejas, senher, ses poria far
⁷⁴⁵Que un mort ja puesca parlar.
L' effan als jusieus anet dir:
Aportes me lo mort aissi.
Tantost lo(s) jusieus mescrezens
D' aqui partiron e van s' en.
⁷⁵⁰Lo mort aneron aportar,
(E) denant l' effant Jhesus pauzar.
Pueis l' effan Jhesus li sonet
E per so nom el lo nomnet.
Digas, Abramon, que t' ai ieu fag?
⁷⁵⁵Ai te ieu mort ni degolat?
Ni t' ai del mur aval tombat?
Vai sus e digas veritat.
Tantost Abramon si levet,
Cant l' effan Jhesus li sonnet.
⁷⁶⁰Pueis Abramon demantenent,
Vezent dels jusieus mescrezens,
En auta vos el anet dir:
Senher, ieu cre senes mentir
Que tu iest hom veray e dieu,
⁷⁶⁵Tot fermamen o crei ieu.
Ferrairon m' avia degolat,
Mai vos m' aves ressuscitat.
Testi sui (ieu) als fals juzieus
Com l' effan era verai dieus.
⁷⁷⁰E non cresien los mescrezens
L' effans fos hom e dieu essem.

Apres aisso non triguet gaire,
Aurires Jhesus que anet faire.
Un bon mati s' anet levar
⁷⁷⁵Et anava se deportar.
Aissi com l' effan s' en anava,
Par la carriera von passava,
El aurit gens mo fort plorar
Et eron dins un grant hostal.
⁷⁸⁰En l' ostal avia un pos.
Un effant font casug lajos.
L'effant era de grant linhage,
Filh d' un gran senher de parage.
Pus filh ni filha non avia,
⁷⁸⁵Aquel metis perdut avia.
Jhesus en l' ostal s' en intret,
Pueis a la gens el demandet,
Per que menavan tan gran plang.
Un juzieu respon ab aitant:
⁷⁹⁰Per un effan que es tombatz
En aquest pos et es negat(z).
E l' effan Jhesus mantenen,
Vezent del pobol e de la gen,
Lains el pos anet sautar.
⁷⁹⁵E totz los juzieus van cridar:
Ailas caitiu! e que ferem
Ni qual cosselh penre porem?
Que ta mal nos est avengut,
Quar tal effan avem perdut.
⁸⁰⁰Car l' effan es de gran linhage,
De gran sanc et de gran parage.
Per que per ser es paor gran,
Que nos venga mal per l' effan.
Enaissi ce s' esgaimentavo
⁸⁰⁵E no sabian vont s' anavo.
L' effant Jhesus del pos issi,
L' effant negas portet ab si.
Et totz aquels que aqui eron
Gran meravilha se doneron.
⁸¹⁰Totz s' aneron fort alegran
Cant els viron Jhesus l' effan.
Ar aurires que anet faire
L' effant Jhesus franc de bon aire.
L' effant que avia getat del pos
⁸¹⁵Aqui en presentia de totz
L' effant Jhesus li vai sonar,
Et apres li vai comandar,
Que si leves demantenent,
Veren del pobol e de la gen.
⁸²⁰L' effan negat ressuscitet,
A son paire vit son effant
Que font alegre e viu e san,
Davant Jhesus s' agenolhet,
⁸²⁵Almorna e merce li clamet:
Senher, ieu cressi certa(na)men,
Tu es ver dieus omnipotent
Et a tu, senher, merce clam,
Car m' as reddut lo mieu effan,
⁸³⁰Qu' avia dos dias qu' era mort
Et de mort lo m' aves estort.

Apres aisso pueis s' endevent,
L' effan Jhesus demantenent
S' en anet en la tencharia.
⁸³⁵So font entre tercia e mieg dia.
L' effan Jhesus sicretamen
Aitant com pot rescostamen
S' en intret en un obrador
Tot lo plus ric el plus melhor,
⁸⁴⁰Ont ac gran re de nobles draps
Que non eron apparellhatz.
Avia n' i de grox et de vermelhs
E mesclatz et persetz vermelhs
E trop gran re mais d' autres draps,
⁸⁴⁵Brunetas et escarlatas.
El maistre de la tencharia
Anet dir a sa companhia:
Joves homes, hueymais es temps,
Que non anem trastotz essems
⁸⁵⁰Espertamens cascu dinar.
Tantost pessem del retornar,
Car nos avem gran re a faire.
Per qu' ieu vos prec non estes gaire.
Totz responderon: fag sera,
⁸⁵⁵Cant serem dinatz, cascu venra.
Trastug essem s' en van anar
Vas lur hostal cascu dinnar.
E cant s' en foron totz anatz,
L' effan Jhesus qu' era remas
⁸⁶⁰Per l' obrador el s' en anet
E totz los draps qu' el atrobet,
Que d(e)vian esser blaus et vertz,
Gruex, ferries e persetz vermlehs
E trop ganre mai d' autres draps,
⁸⁶⁵Brunetas et escarlatas,
L' effant Jhesus totz les mesclet,
Dedins lo perol los getet.
E tantost el s' en volc anar,
En l' obrador anet trobar
⁸⁷⁰Grana et roga e brezilh,
Indi et alun atressi,
Pastel e fustet issamen,
E l' effan Jhesus mantenen
Totas las tenchas a mescladas,
⁸⁷⁵Sur los draps el pairol getadas.
Pueis l' effan Jhesus mantenen
Del obrador part e vai s' en.
Aissi com del obrador issia,
Un d' aquels de la tencheria
⁸⁸⁰Que era vengutz de dinnar,
A la porta vay encontrar
L' effant Jhesus que s' en issia,
Fugen, corren, tan com podia.
E l' escola vai li sonar
⁸⁸⁵E pueis e(l) li vai demandar:
Digatz, effan, don venes vos?
E l' effant non li sonet mot
Mai que s' en anet lo gran trot,
Corrent, fuggent, aitant com pot.
⁸⁹⁰E tantost lo maistre venc
E (tos) sos escolas issamen,
En l' obrador els s' en intreron,
Les draps c' an laissatz, no troberon.
Dis le maistre: que son fatz
⁸⁹⁵Los draps c' aviam aissi laissatz?
Respondo lo massip: que sabem?
Que nos autres desse venem,
Ni las tenchas que aviam laissadas,
Aurian les ne diables portadas?
⁹⁰⁰Grana e roga e brezil,
Indi, alun et atressi,
Pastel e fustet issamen
Be valia cen marx d' argen.
Seria sai hom del mon intrat
⁹⁰⁵Que l' obrador agues robat?
Lo massip tenheire vai dir:
Senher mestre, voles aurir?
Ades cant venge de dinnar
A la porta vau encontrar
⁹¹⁰Aquel effan, sil de Maria,
Que d' aquest obrador issia.
Et ieu tantost vau li sonar
Et anie li desse demandar:
Digas, effan, don venes vos?
⁹¹⁵Et anc el no me sonet mot
Mai que s' en anet lo gran trot,
Corren, fugen, aitant can pot.
Respon lo maistre tenheire:
Per sert, aisso non fon a creire
⁹²⁰Ni no me puesc pessar per re(s),
Aquel effan fag o agues.
Car el mon poiria pas portar
Mieg drap ni de terra levar.
E parlet un dels escolas:
⁹²⁵Maistre, vos sia certas,
Aquel effan vos dic per sert,
Que fai tot jorn d' aitals esquerns.
Pueis lo maistre vai demandar
Asel que l' anet encontrar
⁹³⁰A la porta, cant s' en issia:
Vist si l' effan res ne trazie?
Aquel respon: per ser no vi
Que lunha re portes am si,
Mai que s' en anava corren
⁹³⁵Per mieg la carrieira fugen.
Dis lo maistre: don que so fagz
Aquelas tenchas ni les draps
Qu' en aquest obrador laissem
Ades cant dinnar non anem,
⁹⁴⁰Ni que se so endevengutz?
Auriam los enaissi perdutz?
Tota la tencharia sergueron,
Los draps e las tenchas troberon,
Tot font cremat dis lo pairol.
⁹⁴⁵El maistre ac mot gran dol,
Can vit totz sos draps affolatz,
Peritz e delitz e crematz.
E cridet: caitiu! que faray
Ni qual cosselh penre poray?
⁹⁵⁰Car ieu sui mer et confondutz,
Tant cant avia ai perdut.
E qui m' a donat tal damnage
Ni a fag perdre tot mon obrage?
A negun home ieu non ai tort.
⁹⁵⁵Mai me valgra que m' agues mort.
Laun dels tenheires va dir:
Senher maistre, voles aurir?
En lun hom(e) non anes doptan
Mais en aquel Jhesus l' effan.
⁹⁶⁰Lo maistre a respondut:
(Senher, dis el, si dieus m' aiut),
Si l' effant Jhesus o a fag,
Car d' el non trobarai razo
⁹⁶⁵De la valensa d' un boto.
Car totz tems ai aurit comtar,
Que d' effan se deu hom gardar;
Effant fassa o mal o be,
El non pessa falhir en re.
⁹⁷⁰Els massip tenheires van dir:
Senher mestre, voles aurir?
Per ser crezem que may valria,
Si conoisses que be fag sia,
Que a Jozep non anessem,
⁹⁷⁵E pueis quant denant el serem,
Contarem li lo mal el dan
Que nos a fag lo son effant.
Respon lo maistre teheire:
Oc, si Jozep nom volra creire,
⁹⁸⁰Mai non podi pessar per res,
Que el setis far me volgues
Aquela perdo' e lo dan
Que nos a dat lo seu effant.
E los marsips re(spo)nden totz:
⁹⁸⁵Maistre, no sias dopttos.
Senher Jozep e(s) mot prozom
Et es tengutz per ser bon hom,
Crezem que vos setis fera
E volontiers vos pagara
⁹⁹⁰Tota la perdoa et lo dan
Que vos a fag lo seu effant.
E lo tenheire respondet:
Anem hi, senher, ieu von prec.
D' aqui s' en van tantost partir,
⁹⁹⁵Davant Jozep s' en van venir,
Mot dossamen lo saluderon.
Jozep lo(r) va dir que queron?
Et lo maistre a respondut:
Senher Jozep, ieu suy vengutz
¹⁰⁰⁰Aissi a vos contar t' otratge
Que m' a dat vostre filh et dampnage,
Qu' el m' a mas tenchas et mos draps
Trastotz e delitz e crematz.
Jozep al tenheire va dir:
¹⁰⁰⁵Maistre, fort me meravilh,
Si l' effant vous a fag lotrage
Ni affolet vostre obratge.
Et lo tenheire respondet:
Si dieus m' ajut, senher Jozep,
¹⁰¹⁰Sapjas que ieu non ho diria,
Per lunha re que el mon sia.
Jozep al tenheire va dir:
Maistre, voles vos aurir?
Ieu vuelh que nos autres anem
¹⁰¹⁵A la tencharia e veirem
Aquelas tenchas e los draps
Que nostre effant vos a crematz.
Totz re(spo)ndo:mot volontiers.
Dis Jozep: metes vos premiers,
¹⁰²⁰D' aqui s' en van tantost partir,
A la tencharia van venir.
Dis Jozep: vont so aquels draps?
Senher, el pairol totz crematz.
Dis Jozep: getas los del pairol
¹⁰²⁵Et metes los en mieg del sol,
En loc que nos puscam vezer.
Totz diron: a vostre plazer.
Los draps geteron del pairol
Et meteron las en mieg del sol.
¹⁰³⁰Volgron los a Jozep mostrar
El tenheire va regardar,
Et estet fort miravilhos,
Cant vit los draps d' aital colors,
Que re del mon non sofranhia.
¹⁰³⁵D' aitals colo(r)s ant lo(s) volia.
Cant lo tenheire vit los draps
Tant netamens apparelhatz,
Mot at gran gaug et alegratge,
Cant el arc cobrat son obratge.
¹⁰⁴⁰Totas las tenchas an cobradas
Aitals cant les avia laissadas.
Pueis lo tenheire dis a Jozep:
Senher Jozep, per dieu vos prec
L' effant Jhesus me mostresses.
¹⁰⁴⁵Respon Jozep: non sai ont s' es.
Alcunas ves se levara
Gran mati e pueis s' en ira,
Que nel veirem de tot lo dia,
Que no sabrem ont el se dia.
¹⁰⁵⁰Dis lo tenheire: vespre es gran,
Senher Jozep, a dieu vos coman.
Respon Jozep: (loia) e nom de dieu,
Que autretal m' en iray ieu.

Encaras nos vuelh mai retraire
¹⁰⁵⁵L' effant Jhesus que anet faire.
Un jorn de l' escola partia
Am d' autres effans quel seguian,
(Que) s' anavan essems deportar
(A) foras la vill' e solassar.
¹⁰⁶⁰E dementres que s' en anavari
Par la carrieira vont passavan,
L' effan Jhesus demantenent,
Vezent dels juzieus mescrezens,
D' argila et de terra amasset
¹⁰⁶⁵Am fanga trastot e mesclet,
E pueis l' effan ne fes aussels,
Alaudetas et estornels
Fes ne de ganre de manieiras,
Papagais, merles, cardairinas,
¹⁰⁷⁰E fes ne be entorn cen cens;
Pueis comandet a totz essems,
Que se levesson en volan,
En lor lati cascu cantan.
Totz lo(s) juzieus que aqui eron,
¹⁰⁷⁵Gran miravilhas se doneron,
Cant viron los aussels volar
Ni en lur lati cascu cantar.
Pueis l' effan Jhesus lur sonet
Als aussels et lur commandet,
¹⁰⁸⁰Que totz dissendesso aval
E apres laissesso de volar.
Los aussels tantost mantenen,
Vesens dels jusius mescrezens,
Demantenen tost dessendero
¹⁰⁸⁵El mieg del sol els si pauzero.
Et pueis Jhesus los avenguet,
Mascle am femel ajustar,
Per lo sol les fazia anar
E l' un am l' autre pelejar.
¹⁰⁹⁰Et pueis l' effan los aussels pres,
E mieg de la fanda los mes,
Dins un gran fangua los getet,
Pueis l' effan Jhesus s' en anet.
Els malvais jusius van parlan:
¹⁰⁹⁵Vejas que a fag aquel effant.
Ben pert que petit a dessen;
Per sert, nos autres n' avem mens,
Car nos tot dia l' anem seguen,
Per so que faire li vezem.
¹¹⁰⁰Per sert, el es gran barataire,
Trasgetador et enganaire,
Qu' el nos a trastotz essegatz
A mon saber et encantatz,
Car ieu per sert vos dic,
¹¹⁰⁵Aquel effan es anemic.
Et si hom creire m' en volia,
D' este terra lo getaria.
Les traidors falsses juzieus
Non cresian que l' effan fo dieus.
¹¹¹⁰Ar aurires esquern mot gran
Que anet far Jhesus l' effan.
Los aussels qu' el avia getatz
Ins el fanc e totz emerdatz,
L' effant Jhesus demantenent,
¹¹¹⁵Vezent los jusieus mescrezens,
Los aussels fes volar trastotz
E foron orres e bragos.
E domentre que s' en anavan
Als fals juzius qu' en regardaven,
¹¹²⁰Per mieg la cara l' us doneron,
Les fals jusius totz esmerderon.
E parlet un malvais jusieu:
Senher, e nous ai be dit ieu,
Que per aquel foram aunitz
¹¹²⁵E baratatz et escarnitz?
Car per sert en despieg de nos
Aquels aussels qu' ero merdos
Los fes trastotz del fanc volar
Et pueis los fes en haut balar,
¹¹³⁰Per mieg la cara l' us a dat,
Trastotz caus so aesmerdat.
Cascu dis: aquo nos effant,
Ieu cre miels sia diable gran;
Car si l' effant fos nat de maire,
¹¹³⁵Pessas vos que ho pogues faire?
Aquest o fa per diabl(ai)eria.
Par que per sert ieu non creiria
Aquel sia home ni effant,
Ieu cre miels qu' el sia diable gran.
¹¹⁴⁰Les trahidos falses juzieus
Non cresian que l' effan fo dieus.

Non treguet pueissas temps gaire,
Les fals jusieus c' aneron faire
En un hostal sicretamen,
¹¹⁴⁵Tant com pogro rescostament,
S' aneron trastug ajustar.
Un malvat jusieu va parlar
E cridet: senher, que farem
Ni qual cosselh penre porem
¹¹⁵⁰D' aquel malvat effan Jhesus,
Si li pogram saber negus.
Respondet un malvais jusieu:
Senher, dis el, no vos sia greu.
Sabes que m' avia ieu pessat?
¹¹⁵⁵Si conoisses que sia ben fag,
Que aguessem un ostal gran
E metrem dins ganre d' effans
E sian mascles e femels.
Tuc respondon: mot ben dizes.
¹¹⁶⁰Un savi jusieu a parlat:
Per ma ley, mot es ben dechat.
Pueis lendema demantenent
Los fals jusieus mescrezens
Un hostal anero omplir
¹¹⁶⁵D' effantes, pueis aneron dir:
Fassem aissi venir Jhesus.
Ben dizes, respondon cascus.
Pueis tantost guerre non treguet,
L' effan Jhesus aqui passet.
¹¹⁷⁰E los jusieus van li sonar
E apres van li demandar
Que devines o que disses
So que dins aquel hostal es.
Respon Jhesus: ben ho diray,
¹¹⁷⁵Pors e truegas, que be o say.
E totz les jusieus an parlat:
Vejatz com be a devinat,
Que lo son effantos petitz.
E aneron l' ostal obrir
¹¹⁸⁰E van laintre regardar,
Pessero les effans trobar.
Am per pauc de dol no son mortz
Cant an vist que sont treguas e porx,
E resteron totz encantatz
¹¹⁸⁵E foron totz dolens e iratz.
Et estan, entiols meteis
Laun al autre van dizen:
Baro, de janaha
Tamalmutz alia;
¹¹⁹⁰Car nos autres em confondutz;
Tant negre jorn nos est vengutz.
En lur ebray els van parlan:
Be son intratz en gran malan.
Lus lus effans qu' eran tan be(n)ls
¹¹⁹⁵Endevengutz tregas e porsels.
Qual dis que aquel sia effant?
Per sert, el es diable gran,
Dels majors que ins en infern sia,
Car el per sa gran diablia
¹²⁰⁰Per sert nos a totz encantatz,
Car el es endemonizat.
El es un gran baratador,
El mon non cre que sia major.
El sap tota l' astronomia,
¹²⁰⁵Las set artz en nigromansia.
Les trahidos falsses juzieus
Non cresian que l' effan fo dieus.

Apres aisso un autre dia
Un prozom un hostal bastia.
¹²¹⁰El prozom avia nom Malep,
Cosin german es de Jozep.
Font vengutz en la fustaria
Comprar un fust, mester li avia.
Malep lo fust anet comprar,
¹²¹⁵Tres bes ou catre mezurar.
Lo fust per sert pron lonc li fo,
Fes lo portar a sa maiso.
Cant Nalep volc lo fust pauzar
Sus la mayo ne alo(n)gar,
¹²²⁰Lo fust funt breus mai d' una brassa.
Tant a de dol, no sap que fassa.
Sus lo fust s' anet assetar;
L' effant Jhesus anet intrar,
Trobet Nalet que se sezia
¹²²⁵Sus lo fust de malenconia.
Jhesus (a) Malet anet dir:
Co estais am tam de cossir?
Ado(n)x Malep respondet li:
Mon effant, dis el, huy mati
¹²³⁰Ieu aniey aquest fust comprar,
Pueys apres l' aniey mesurar,
Lo fust per sert pron lonc me fo,
Fis lo portar a ma maison,
E tant volgui lo fust pauzar
¹²³⁵Sus la maizo ni alogar,
Lo fust est cortz mai d' una brassa.
Tant soy iratz, no sai quem fassa.
Tantost respondet Jhesu Crist:
Nalap, non estias tant trist.
¹²⁴⁰Prenes lo fust del cap de la
Et ieu penrai aquel dessa
E veirem sil poirem tirar,
Que lo poscam pro alongar.
E Malet l' effan regardet:
¹²⁴⁵Effant, dis es, sabes que est?
Ieu ai pron mal, no me trufes.
L' effan respon: no faray ges.
L' effan Jhesus demantenen
D' aqui partit et anet s' en.
¹²⁵⁰E Malet estet cossiros
E font maritz e doloiros.
Pueissas l' effan tost retornet,
An Malet autra ves sonet:
Cant non prenes lo cap de la
¹²⁵⁵E ieu penray aquel dessa,
E pueissas entre me a vos
Lo tirem tan tro sia pro lonxcs.
Malep tantost la um cap pren,
Jhesus pren l' autre mantenen
¹²⁶⁰Et aneron lo fust tirar
Detz palus e plus van alongar.
Anc ne covent a torar,
Tant l' avian tirat, alongat.
(E) pueis Malet l' effan regardet
¹²⁶⁵Et denant el s' agenuolhet.
Senher, dis el, ar crezi ieu,
Que tu es hom et verai dieu.
E fas ho be tot essanblan
E cas tu treire o devan,
¹²⁷⁰Car en qualque part que tu sias,
Tu o demostras cascun dia.
Pueis Nalet tantost mantenen
D' aqui partit et anet s' en
Sercar gens quel vengron aidier
¹²⁷⁵Al fust sus la maiso posar.
E cant Nalet anar se font,
Jhesus ses autre companho
Lo fust et el anet posar
Sus la maison ben alongar.
¹²⁸⁰Pueis l' effan Jhesus anet s' en,
E Nalep demantenen venc
Et intret s' en dis la maizo
E vit que lo fust pauzat fo.
E vai se fort miravilhar,
¹²⁸⁵Sus la maison vai regardar
E vit lo fust mot ben pauzat
Et asson ponch ben alo(n)gat.
Nalap adon s' anet pessan:
Aquo a fag Jhesus l' effan.
¹²⁹⁰D' autres miracles demostret
Aitant cant am los juzieus estet.
Les mortz fazia ressuscitar,
E los cranx corre et sautar
E les sortz faria aurir
¹²⁹⁵E los mutz parlar et guerrir.
E am tot so(l) los fals jusieus
Non cresian que el fos vers dieus.

Aras son mons romans fenitz.
A totz sels que los an auritz,
¹³⁰⁰Lur don dieus far tal portamen,
Los armes vengo a salvamen.

AMEN

EXPLICIT


Detur pro pena scriptori pulera puella.
Symon Bretelli de Tornaro Cameracen. dioc9 scripsit anno
nativ. christi M.CCC.LXXIIII die. XXª martii.