El medico (Anton Maria Lamberti)

Un Signor opulente,
Che de saver chi'l sia no importa gnente,
Dise un zorno al so medico: Sentì,
Dotor mio caro, quel che trovo in mi,
E che no so spiegar:
Mi no son uso de desordenar,
Son ben costruto e san,
Co magno mi divoro come un can;
Mi no servo al capricio nè a l'usanza,
E magno roba che pol dar sostanza,
Epur per mia vergogna
Ogni zorno devento più carogna. —
— La m'à fato l'onor
(Risponde sior Dotor)
De invidarme più volte al so disnar,
E mi no l'ò mai vista a mastegar,
Onde con l'opinion dei boni autori...
La lu interompe, come fa i signori;
Disendo gentilmente,
No, no xe vero gnente,
Ma s'anca fusse, ò sempre sentio a dir
Caro Dotor, ch'el cibo à da nutrir. —
— E chi no l'à da dir?
Cazza! i putei lo sa;
Ma col vien preparà,
Triturà, masenà,
Dal che ghe ne vien drio
Che essendo facilmente digerio
In suso e in sangue el passa;
E questo è 'l caso che chi magna ingrassa;
Ma imbocà e divorà,
Come Vostra Celenza à sempre usà,
No per Dio Baco che nol fa bon pro,
Ch'el se corompe in corpo, e'l passa zo.

Vu altri che lezè
Tanti gran libri, o sia che li passè,
Vorave, se podessi,
Che sta istoriela a mente ve imparessi.