El granzo e l'ostrega

Contava un pelegrin,
Ch'i abitanti del regno submarin
Ga anca lori i so ingani
Come nu' altri umani.
Per esempio, el diseva,
Che a l'Ostrega ghe greva
De star sempre serada,
E che no la dà mai na spalancada,
Ma la fa una sfeseta
E per quela ghe va qualche giozzeta,
Ma el Granzo furbo, che la vol magnar,
Sta atento, e col la vede un fia slargar,
El ghe tra co le bramche un bel sasseto,
E quela el crede giozza; e l'intra neto.
Pena che la se acorze, la fa un sforzo
Per serar suso el scorzo,
Ma fra i do scorzi el sasso à fato presa;
E ghe resta la sfesa.
Alora el Granzo fica la so branca,
El la sforza, el l'averze, el la spalanca;
E col l'à divorada
Su l'alega el va a dar 'na spassizada.
Recordeve regazze
Che de sti Granzi ghe ne xe gran razze,
E che lode, carezze e regaleti
Xe cosse bele, ma che i xe sasseti.