El fasan

A una cena formal,
Dove che se se trova e ben e mal,
Aveva magnuzzà,
Sbevuchià,
Chiacolà,
Quando ch'el rosto in tola s'à portà.
Sto rosto l'ò trovà gustoso e bon
Ma 'l m'à parso Capon
Non abadando gnente,
Come se fa a ste cene,
Ch'el gavesse da drio tacae le pene;
Ma quando che una dona,
Che gera de la cena la parona,
Per farme un scherzo, me l'à messe in man
L'ò cognossue per pene de Fasan.
Alora in tel magnar
Quel rechioto de rosto che restava,
M'à parso de trovar
Quel gusto che in avanti no trovava.
E mastegando pian
Go sentio propio el gusto del Fasan;
E ò dito, soridendo in tel magnar,
Ste pene me l'à fato fasanar.
Fasani per Caponi,
Caponi per Fasani
Anca i bipedi umani
Del mondo a le gran cene
Vien tolti per le pene.