El diavolo de paradiso

In fondo al cuor gavemo un diavoleto
Che dorme, dorme, e po se fa sentir.
El balsama, l'impiaga, el scalda el pèto,
El fa viver feliçi, el fa sofrir.

No ga l'inferno el fogo nè i tormenti
Ca ghe sto diavoleto fra i so denti.

E pur l'è tanto caro e tanto belo,
Ch'el val più assae dei anzoli del çielo.

Tosi da maridar, no abiè paura
Del diavoleto che no dorme in cuor.
Inutile sarìa la vita e dura
Senza quel mostro che ve fa teror.

Lu piaga e sana... co la stessa boca
El dà pene e conforti a quei ch'el toca.

Lu xe mestro de vizi e de virtù...
Guai, guai se al mondo no'l ghe fusse lu!

Povari quei che vive e no lo sente
Svegiarse in pèto come a l'alba el sol.
Povaro el cuor che invecia indiferente,
E le so pene e i balsami no vol.

El mondo, el çielo, l'universo intiero
In paragon de lu no conta un zero.

Nissun lo vede, e pur, senza saver,
Tuto e tuti se piega al so voler.

La luse de do bei oci, un bel viso,
Svegia el diavolo santo, el santo amor
E se spalanca alora el paradiso,
Nove delizie prova alora el cuor.

Per lu, per lu, se vive e se lavora,
Per lu che sto mondazzo orido infiora,

Per lu che vien dal çielo a consolarne,
Re dela vita, l'anema e la carne.