El desiderio de l'amigo

Una caseta persa tra i fiori,
Che de profumi la inondarà,
E viver quieto, senza dolori,
Senza i fastidi dela çità.

Co 'l sol che leva montar in sela,
Dormir co spunta la prima stela.

Piantar la vigna, farte un zardin,
Viver la vita de 'l contadin.

De onori e gloria, Pompeo, far senza,
Là su le rive de 'l to Livenza.

Come un bel sogno, che te consola,
Come un bel zorno de primavera,
Passar el tempo che presto svola,
Lesto a l'aurora, straco la sera.

Goder tra i fiori la dolçe arieta,
Goder la pase de la caseta,

Trovarla bela come una regia,
Co' la to scarsa cara famegia,

Sentirte libero, sentirte forte,
E sognar sempre fin ala morte!