El consegio

Se Amor mai da vu se vede,
Cari puti, a zogolar,
Per pietà no ghe dè fede,
No lo stessi a carezzar.
Su la boca el mostra el riso,
La dolcezza sul so viso,
Ma col rider su la boca
Pizzegoni e slepe fioca;
E fra mezo a le carezze
Mile stili, mile frezze
Quel furbazzo sa missiar.
Se savessi che zogheto
Che m'à fato un dì costù!
Dopo averme chiapà streto
Da no moverme mai più,
Con un ago damaschin
Su la pele a pian pianin
Tuto quanto el me ponzeva;
Mi pianzeva; e lu rideva,
E 'l diseva: ti xe bravo,
Ma, birbon, t'ho fato schiavo.
La gran rabia che go bu!
Saveu come che l'à fato
A chiaparme sto bricon?
El s'à messo come un gato
Quachio quachio in cufolon.
L'à spetà che un dì Nineta
Me contasse una fiabeta;
Mi, credendo esser in porto,
De colù no m'avea acorto;
E lù, vien per da drio via,
Chiapa, strenzi, e mena via,
Nè val pianti, nè rason.
A scravazzi de sta sorte
Sto baron ghe ne sa far,
Come un bogia el dà la morte,
Quanto un bogia el sa strozzar;
Lu ga lazzi, el ga manère,
El ga forni, el ga caldiere,
El ga corde e manganeli,
El ga chiodi, el ga marteli,
E lanzete e gamaùti...
Ah! scampèghe, cari puti;
No se vince che a scampar.