El cafè Florian

Simpatico cafè pien de memorie,
Dove se unisse tute le nazion,
Dove galegia çentomile borie
E per sapiente passa el piu mincion,

Ne le to bele camare la zente
Capisse el proverbiàl dolçe far gnente,

E destira la fiaca a ciacolar,
Convinta che no resta altro da far.

I bei vecieti, i veci tirai su,
Che sente ancora el sangue ne le vene,
Che sente viva in cuor la zoventù,
E da 'l tempo no vol pesi o caene;

I veci ancora forti e prosperosi,
Che se scalda e se impizza come tosi,

Vien al cafè, se unisse ai zovenoti,
E ciàcola de done e de ridoti.

Ma quei che sente su le grame spale
El peso dei setanta ani calar,
E se strassìna in sta noiosa vale,
Sospirando che indrìo no i pol tornar,

Quei là dì e note parla, se dileta
A semenar le idee de la Gazeta;

E per bisogno e impulso natural,
Beve el cafè, tabaca e dise mal.

Qua i zovenoti ciàcola, se move,
Fuma, leze i zornai, pìsola e zoga.
Qua i toseti, che fa le prime prove,
Mormora dele fèmene più in voga.

Qua se pesa e conosse tuto e tuti,
Povari e siori, onesti e farabuti.

E per passar el tempo alegramente,
Se fa de tuto per no far mai gnente.