El baseto

Più interessada,
Che inamorada,
Come fa tante
Che ga l'amante,
Un dì Nigela
La pastorela
Do basi bei,
Per trenta agnei,
Ga dà a un pastor
Ferio d'amor.

Co è sta 'l doman
Ghe un novo pian,
Elpin ga fato
Megio contrato,
Perchè Nigela
La pastorela
Trenta baseti
Per do agneleti
Ga dà al pastor
Ponta in tel cuor.

Nel doman l'altro
Lu fato scaltro,
Ela inzucada,
E inamorada,
I trenta agnei
Dai basi bei
La ga dà indrio
Po per idio!
Per un basin
Che ga dà Elpin.

El zorno dopo,
Questo mo è tropo,
Ela i do agnei
E 'l can co quei
Tuto la dona,
Za se doveva,
Per un baseto
Che a un bel museto
L'ingrato à dà,
Sora marcà.

Done un gran caso
Xe questo qua.