El Trionfo d'Amore

Ah nò nò, no m'ingano per certo...
Ah sì sì, me vol ben la mia Nina;
El so cuore ala fin go scoverto,
E son certo — che la me vol ben.

Mi de dirghe el to amante t'adora
No go avudo coragio gnancora,
Ma i mi ochi ghe parla abastanza
E i ghe ruma sin drento del sen.

Ah!... stà queta, mia dolce speranza,
Che d'amore — al mio cuore — xe pien.

Mi no posso, se ancora el volesse,
Lamentarne un tantin de la sorte;
Faria guera el mio proprio interesse
Co m'avesse — a lagnare un tantin.

La mia Nina dassèno se m'ama
Xe ala fin contentà la mia brama;
Saria ingiusto, indiscreto, imprudente
Lamentandome un fià del destin.

Ah sì sì, un dolce amore e inocente
Xe un movente — del'Ente — divin.

Sto squisito contento che provo
Nol darìa per un regno, vel zuro,
Chè in tun regno un contento no trovo
Cussì novo — soave cussì.

Mi no cambio sto imenso mio gusto
Col splendor d'Alessandro o d'Augusto,
Chè, se quei comandava ala tera,
No i provava el piacer che go mi.

Sti superbi dal'alba ala sera
Sempre gera — in gran guera — a quei dì.

Grazie al Cielo, quel fìà che possedo
El me basta, e de questo m'apago,
E, se in grazia de Nina me vedo,
Mi no credo — d'esiger de più.

Grazie al Ciel, mi go un cuore che boge,
Ma so ben limitar le mie vôge:
Sia pur mia la Nineta, e ricuso
Tuto l'oro che xe nel Perù.

Ah! co vardo un tantin quel bel muso
Mi me bruso... confuso — mi so.

Fin sto zorno dal dì che son nato
Son sta sempre infelice, el confesso,
Ma in adesso son tropo beato,
Se barato — in sta zogia el dolor.

Mi me scordo i mii spasimi tanti,
Me desmentego e palpiti e pianti...
L'è un gran premio al più duro tormento
La vitoria d'un candido amor!

Ah! el vigor de sto caro contento
Me lo sento — fin drento — del cuor.

L'è un contento el più dolce, el più belo,
El più grando, el più puro, el più vero,
Che dei gusti imortali del cielo,
(Soto un velo) — un' idea ne pol dar:

Che del mio nobil esser m'avisa,
Che me inebria, che me imparadisa...
Ch'ex abrutto... in do piè... cussì a strozzo
No se pol veramente spiegar.

Per lodarlo son balbo... son mozzo...
Mi go el gozzo... e m'ingozzo... a parlar.

L'è sto raro piacer, che me oprime,
Nina mia, perchè so che ti m'ami
Tanto raro piacer... che le rime
No lo esprime — abastanza, lo so.

Meto zo per adesso la Lira;
Lassa, o cara, che un poco respira...
Chè al furor d'un piacer cussì grando
Me sgomento, e più lena no go...

Ma el to nome col cuor d'ogni quando
Ninolando — cantando — andarò.