El Ritrato de Nina

Sentì el ritrato de quela Nina,
Ch'el cuor me bisega la note e el dì.

Se l'è una femena quasi divina,
Co vorè intendarla, dirè de sì.

Media statura, presenza grave,
Sembianza amabile, gentil parlar.

Modi tranquili, trato soave,
Tuta adorabile nel suo portar.

Ma esaminando le so fatezze
No sò depenzarla come che va:

Chè, ben pesade quele belezze,
Per mi l'è angelica la so beltà.

Ela ga negri quei so cavèi,
E negro l'ochio, che parla al cuor.

Ela i tien bassi quei ochi bei
Co tanta grazia, che sforza amor.

Quanto ala boca, la fronte el naso,
La xe una formula per un tizian;

Ma quei lavreti merita un baso
Quando la i verze cussì pian pian!

L'è tuta piena de legiadria
Quel'aria flebile, che la ga in sè.

Per maëstosa fisonomia
La se rimerita l'amor d'un re.

Più bel profilo mi no lo trovo...
Come l'è amabile! vardèlo ben:

Provarè tuti quel che mi provo,
Cento dolcezze lù desta in sen.

Se pò de tinta l'è palideta...
Ah! sì, anche in questo la spira amor;

Perchè anche palida xe la violeta,
Ma la violeta xe un gran bel fior.

De quando in quando (sia dito el giusto)
La ga do rose, che no sta mal;

Ma la par megio, per el mio gusto,
Co quela ciera sentimental.

La xe una Venere fisicamente,
Mi per conchiudarla ve dirò qua:

Ma esaminandola po moralmente
L'è una Dea Palade spuà incarnà.

Eco el Ritrato, ma tuto vero,
De quela Femena, che adoro mi.

La chiamo Nina, ma per mistero
Lasso una silaba prima del Ni.