El Lovo e la Cigogna

Un Lovo, zentilomo del paese,
Tornando da le nozze de do Gati,
Dove, per comparir grato e cortese
L'aveva divorà piatanze e piati,

Gaveva ancora un osso ficà in gola,
E nol podeva proprio liberarse;
Oe... ghe andava mancando la parola,
E za el gera là là per sofegarse.

Ghe mete el beco drento in pressa alora
Una Cigogna che la gera in ziro,
La branca l'osso, la ghel tira fora:
E 'l Lovo: Oh, oh! no moro più, respiro.

La Cigogna se aspeta un regalon;
Gnanca el la varda. Ela ghe dise a pian:
Me donela qualcossa, za paron?

E lù: Credo, comare, che scherzè,
Vò lassà tirar fora el colo san,
E volè che ve paga? ingrata, andè.

Done, za me intendè,
Gh'è el Lovo anca fra nu. Felici
Se in premio de la vostra carità
Tuto el mal ch'el pol farve nol ve fa.