El Lion e 'l Mossato

Spassizava gravemente
Un Lion de casa vechia.
Un Mossato ghe va arente;
E ghe dise in t'una rechia:
Che siroco sfondradon!
Uh! che caldo, za Paron!

Con un cefo da Megera
Ghe responde so Celenza:
Escremento de la tera,
Chi t'à dà sta confidenza?
Vil inseto!... Chi è di là...
Cazzè via costù de qua.

St'improperi, oh Dio! al Mossato
Fa vegnir mo su la stizza.
El ghe dise: Xestu mato?
A mi ingiurie! Dìme, schizza?...
Se me meto... sapi ben
Ch'ogni bissa à el so velen:

Gastu boria, dì, per quela
Celeghera sgrendenada?
Ti me mostri la mascela,
Po le sgrinfe?... l'è falada;
Da volatile d'onor
Te go giusto... ma de cuor:

Varda el toro... xelo grando?
I so corni no ghe giova
Se lo vago tormentando,
El me cerca e nol me trova.
Fa el to conto... come!... no!
Ben... mio dano! proverò.

Dito questo, beca e via;
E po torna, beca e svola;
El ghe fa una becarìa
Dal bonigolo a la gola;
Per le rechie el ghe va su;
Beca e sbigna, nol gh'è più.

El ghe sbalza dai zenochi
Al barbuzzo, a le zenzive;
El ghe ponze el naso, i ochi
E le parti le più vive;
Fin per farlo desperar
Ghe va el sfinter a becar:

El Lion, ghe ga presenti
Tanti eroi de casa soa;
Che formai crede i viventi
Per tegnirghe su la coa;
No se volta, marchia a pian,
Sta con aria da Sultan;

Ma sentindo che i beconi,
A la barba dei antenati,
Lo crièla: mo, cogioni,
Tra lu el dise, questi è fati;
El scomenza a pian pianin
A far scurzi da arlechin.

Per finir po quela scena
Manda al diavolo el sussiego;
Co la coa sferza la schena,
Co le sgrinfe se fa un sbrego;
Fica i denti dove el pol,
E so dano se ghe dol;

Nè podendo mai cucarlo,
Se ghe svegia un tal rabiezzo
Ch'el fa cosse da ligarlo.
El Mossato ride un pezzo,
E po canta in do-re-mi:
Te l'oi dito, schizza? a ti...

Fato el trillo, beca e via;
Ma scorendo la campagna
El da drento a una scarpia
E un ragneto se lo magna!
Cussì avemo do lezion
Dal Mossato e dal Lion.