El Colombo e 'l Barbagian

Tormentà dal mal dei calcoli
Gera a morte un Barbagian,
El sustava tra le natole,
Biastemando come un can:

«Tuti i osei ga el cuor de porfido,
I m'à tuti abandonà,
Son qua solo, senza un mocolo.
Moribondo, desparà.»

Sti lamenti, sti rimproveri
Va a ferir un colombin,
Che se spulesa i garetoli
Su la gorna là vicin.

El colombo tra i volatili
Xe 'l più tenero, el più bon:
Chi a l'amor xe più sensibile
Sente più la compassion.

Sgambetando là el se furega
Dove el geme note e dì:
«Via, bon vechio, deve animo,
Consoleve, so qua mi.

(Povareto l'è un cadavero!)
Voleu gnente? gaveu sè?
Quanto xe che xe sta el medico?
Cossa diselo? parlè...

Chi ve assiste? Cossa vedio!
I ve lassa sgangolir;
Qua no gh'è nè miel, nè zucaro,
No gh'è nn vovo da sorbir.

No gavè un nevodo? un zenero?...
Xeli soto el peruchier?
Perdoneme... mi strasecolo!
Dove xe vostra muger?»

«— Che muger!» risponde in colera
Al Colombo l'amalà,
«Obligato a le so grazie!
Sè un bel tomo in verità.

Sì, doveva una petegola
Una mata sposar su,
Per aver in dote el titolo
De cometa, de cucù?

Mantegnir quatro sie discoli,
Che ogni zorno in tel so cuor
Gavaria canta l'esequie
Al so caro genitor?

Solevarli dai so debiti,
Cocolar la bissa in sen,
E aver po per gratitudine
Un regalo de velen?

No go fioli, no go zeneri,
Mugiei, corni... no ghe n'ò!
Che nevodi? senza vederli
Spero in Dio che morirò.»

«Me parè ben malinconico!
De parenti se stè mal,
Gh'è i amici. L'amicizia
Per i afliti xe un cordial:

Sarà forsi mezzo secolo
Che sti copi frequentè,
Podè averghene... co un subio.
Ve ne capita do tre.»

«Bò pison, vegniu dal Messico?
(Ghe risponde el Barbagian)
«No savè che amici e tossego
Xe sta sempre tuto un pan?

No i vol altro che i so comodi,
I ve cambia el tu col mi,
I ve insidia, i ve calunia,
I ve lacera ogni dì.»

«Ma me par squasi impussibile
(Torna a dirghe el Colombin)
Che no abiè con un volatile
Fato almanco un beverin.»

«Co sti furbi, co sti perfidi
Mai me son domesticà,
A le curte, son misantropo,
Nè so mai d'aver amà.»

«Mo minchioni! vechio tangaro,
No te so mo cossa far,
Crepa, schiata, tiò sto mocolo,
E va a farte... soterar.»