El Cingial e 'l sior Marchese

El marchese Merliton
Rico, vano e macaron,
(Qualità gentili e bele
Che sol viver da sorele)
Se credeva, poverazzo,
D'aver tute in testa a mazzo,
Seben sparse in tante parti
Le dotrine e le bel'arti,
E vedeva in tei so bezzi
Scienza, brio, talenti e vezzi.

Ogni zorno una dozzena
De bei spiriti de schena,
De sublimi progetisti,
De antiquari, de modisti,
De mercanti d'antrezzà,
De gargati in elafà,
De maestri de penelo,
De dotori de scarpelo,
De alchimisti, de architeti,
De oratori, de poeti,
Tuti amici de la gola
Decorava la so tola.

Chi mostrava un disegneto,
Chi diseva su un soneto,
Chi stonava un bel rondò,
Chi strussiava do bomò
Chi abozzava una chiacona,
Chi l'arena de Verona;
Questo imagina un negozio,
Quelo giusta l'equinozio,
Uno dona, st'altro tol,
E fa un terzo i conti al sol.

El marchese gravemente
Sente tuto come gnente,
Tuto esamina e corege,
E stranua sentenze e lego.
Muti, estatici tra lori
Quei artisti, quei dotori
Svoda intanto fiaschi e goti:
Dise in cuor: viva i merloti!.
Sbragia e ciga come mati:
Viva el re dei mecenati!
Dopo pranzo so celenza
Ga più calda la sapienza,
E va al fresco d'ordinario
Nel so parco solitario.
Squasi sempre ghe va drio
Co rispeto sior Matio,
Fator vechio de paruca,
Colo storto e bona gnuca.

Verso sera, no xe un mese,
Spassizzando el sior Marchese
Per la solita verdura,
Che se fava un poco scura,
Tira fora l'ochialeto
E contempla el so boscheto.
Stava in quel col sgrugno in guera
Un cingial strozzando tera,
Come i è soliti de far
Quando i denti i vol guar.

Osei picoli, osei grossi,
Gardelini, petirossi,
E cainegri e fagareli,
Merli, lodole e storneli,
Russignoli, passaroti
Amaestrai da Pachiaroti,
Fava intorno svolazzando,
Gorghegiando, becolando,
A quel bruto animalazzo
Quela corte che a palazzo,
A l'usanza veneziana,
Se fa al savio in setimana

El caonegro qualche volta
Fa un bel trilo; e li l'ascolta.
Qualche volta el russignolo
Se granisce un bel a-solo;
E sporzendo el sgrugno in su
Par mo proprio che colù
Vogia dir, no: da cingial,
Che no gh'è po tanto mal.

El Marchese incocalio
Dise alora a sior Matio:
«Oe! fator, coss'è st'istoria?
Vardè là co quanta boria,
Co che pegio da censor
Fa quel porco mo el dotor.
De la musica vocal
I fa giudice un cingial!»

Con un bel riverenzon
Al marchese Merliton
Sior Matio risponde lesto:
«Oh! za no, no è minga questo,
Sti osei, vedela celenza,
Va drio al porco con pazienza,
Perchè lu smove la tera,
Fa dar suso qualche miera
De graneti, de vermeti
Che per lori xe confeti.
Cantuzzando i lo compagna
Finchè dura la cucagna,
Po i ga el porco, e la sentenza...
Me ricevela, celenza?»