El Can e 'l Gato

Oe, per pagar le fritole a l'amigo
Toni à vendù el so can geri al mercà.
Fasan da la so corda se destriga,
E torn'a casa! el gera nato là!

I lo cerca, i lo trova, i te lo liga
I ghe paga a legnae la fedeltà,
E i lo torna a cazzar, ma con fadiga,
Dal sior conte Susin, che l'à comprà

Stava sustando el povero Fasan
Sorpreso, desolà. Disè, compare!
(Ghe sgnaola arente un bel Gaton surian):

V'à da intender vostra siora mare,
Che i paroni ne tegna Gato e Can
Per i nostri bei occhi? Ghe xe care
         Le bestie più rare,
Fin che i ghe n'à de bisogno; e po schiao siori,
I sacrifica amici e servitori,
         Ai bisogni magiori.
La me xe nata a mi, là dal Curato,
Dopo dies'ani! Zorzi:
In casa gh'è più sorzi?
Sior no! - Cazzemo via, donca, sto Gato.
         E vu, sior Fasanelo
Ve credevi esentà? Se', propio, belo!