El Bartoldo

Al tempo che Alboin re de Verona
tegnea le corte su a Castel S.Piero,
e l’Adese el girava a la carlona,
strassinando da mato el so poliero,

vol che da i bagni caldi de Caldiero
dopo de aver ben bastonà la dona,
el Bartoldo vilan fasesse viaio
co un quarel de polenta e del formaio!

Gh’era in aria un cìo cìo de primavera,
che meteva in boresso tuti quanti;
ci vestiva una giaca più ligiera
e ci andava descalsi e sensa guanti;

i albari mea fiori galanti,
su i castei sventolava la bandiera,
e Bartoldo anca lu come da un vaso,
butava fora brufoli sul naso….

Par combinar la ghigna de sto omo,
ah! No convien ‘conomisar parole,
che çerti mostri sul portal del Domo,
j-era in confronto suo gropi de viole;

la so pele parea fata a spongiole
che j-è quei fonghi che vien zò da Como,
e le mane bison che te le cubi
al bruschineto che se neta i tubi…

La so testa sonèa la piassè grossa
bocia de anguria mal maurada in tera,
che la porta le plache de la lossa.
Do gran recione a la carabiniera

sora un naso girevole a cerniera
e ‘ na bocassa che faseva angossa:
oci de fogo, segie de pel mato,
eco Bartoldo e ’l so più bel ritrato!

E pur drento a sta anima vilana
scolpida da un birbante scultor,
gh’era un vagon de inteligensa sana,
insucarà de spirito inventor

che anca davanti a un re, a un imperator,
ben o mal che sonasse la campana,
el Bartoldo vilan, ma furbo e forte
l’era bon de zugar galine e corte!

L’era la corte un gran palasso a giorno
sul genere de quei che i fa in confeti:
lose e giardini che girava atorno
su colonete traforade e archeti,

da dove sventolando i fassoleti
quando qualche guerier sonando el corno,
se lo vedea passar arme e bandiera
sul marciapiè de la Piera…