Du meditöl eseistob

From Wikisource

LIÄNS LÄTIKÜN FA THOMAS INGOLDSBY.

Du meditöl eseistob, meditöl, meditöl,
Ekanitof gälo bödil, siedöl su letuig!

Montial nobik ekömom,

E vafem smufik enidom,

Lad oma kinik eyofom

Libiko;

Du meditöl eseistob, emonitom mofo.

Du meditöl eseistob, meditöl, meditöl,
Ekanitof lügo bödil, siedöl su lorabim!

Jiniko, pleni bludik,

Montiali ga nelifik,

Jevali gonöl libik

Elogob,

Du meditöl eseistob, pidöl eleglifob.

Du meditöl eseistob, meditöl, meditöl,
Ekanitof gälo bödil, siedöl su bimalam;

Egolof vilgin bei,

Ekonom yunan löfi,

Emekom ofen seifi

E yulis;

Du meditöl eseistob, lads egäloms okis.

Du meditöl eseistob, meditöl, meditöl,
Ekanitof lügo bödil, siedöl su spinabim;

Yunan igolom de of,

Vilgin helis eslütof,

Devöl lügo eplonof,

"Pemotob!"

Du meditöl eseistob, funi ofa elogob.

Du meditöl eseistob, meditöl, meditöl,
Ekanitof svido bödil, siedöl su lolabim,

Ekömom cilil jönik

Ko logod sofik, molik,

Laböl smilili gälik

Komü fat;

Du meditöl eseistob, kerubik ebinom von at.

Ab meditöl eseistob, meditöl, meditöl,
Ekanitof lügo bödil, siedöl löpü kofin;

Smilil gälik pinosom,

Logod vietik ivedom,

Äsliko svana jinom

Müepen,

Du meditöl eseistob, biedik eflumom ga dlen!

Du meditöl eseistob edisom sol golüdik,
Ekanitof gälo böd at du enidom su blöt ofa

Ko köls lejönik telmil,

E du eflitof äl sil

Ejinos das tävi al domil

Elogon;

Du meditöl eseistob, sinifi ofa elilon: -

"Sukolöd obi mofo,

Fezogön pötos leno," -

Ejinof sagön somo,

"IS TAKEDON!"

Se Kosmopolan 1893, Nüm: 8, Pads: 116-117.