Bel'autuno, felice stagion,
Gera tanto che mi te aspetava,
Go per ti la gran mata passion;
Mi per ti sospirava, smaniava,
Se più longo durava l'istà,
Senza ti mi sarave crepà!
Tute quel che in vaghissimo aspeto
Ne produse le piante e 'l teren,
Tuto quel che dà lucro e dileto,
Bel'autuno, per ti ne provien:
Ne provien per ti l'ua, sto gran fruto
El mio pasto, el mio sangue, el mio tuto.
Cari amici, che trasporto
Per sto fruto che mi go!
Più che 'l porco per la gianda
Mi per l'ua son spanto morto;
La passion ze tanto granda,
Che spiegarvela no so
Malapena spenta i bampoli
Mi no trovo più riposo,
E devento fastidioso
Come un toso inamorà;
Più no magno, più no bevo,
Prima ancora - de l'aurora
Presto - lesto mi me levo
Mi me vesto,
E po dopo per campagne,
Per coline, per montagne,
Fazzo intorno un longo ziro
Visitando le piantae,
Tanto d'ochi mi ghe tiro,
Me le magno co le ochiae,
Ma per quanto che le miro
Mi no vedo altro che fogia;
E l'ueta ancora in fior
La me fa crepar de vogia
Ai sentirghene l'odor:
Ma che odor
Consolator!
Che fraganza che inamora,
Che de tuto va 'l dessora,
Che ristora - naso e cuor!
Che camamo, che calamo,
Che ladano, che galbano,
Che crocino, che telino,
Che nardino, che melino!
Vegna pur el cardamomo,
Vegna el gran panatenaico,
El famoso cirenaico,
L'amoricino, el costo, el gizir,
L'ogio arabico, el nardo, el mazir.
No no gh'è balsemo
Fra tanti e tanti,
Che vaga avanti
De questo quà.
Quanti sesti che fazzo in quel ato,
Trasportà da la forte passion!
Se dirave «Zaneto ze mato
Povareto! el me fa compassion.»
Spasemà, spirità, desparà,
Senza forza, nè ose, nè fià,
Togo in man quei fioreti, e li naso,
E li struco, li lico, e li baso;
Da l'angossa me par de morir.
Ueta viscere, caro el mio ben,
Perchè mai no far ti come 'l figo
Che do volte in t'un ano el ne vien!
Ma no zela una mezza vergogna,
Che ti tiri a vegnir tanto in longo.
To l'esempio e la norma dal fongo,
Che per questo aspetar no bisogna;
Co do giozze de piova che fa
Soto i ochi el ne sponta a l'istà.
Ma ti, cagna, ti fa la preziosa,
La superba, la bela e ritrosa,
Ti conosci la propria belezza,
E, tirana, ti ga la vaghezza
De vederme a bramar, a patir.
Mi no credo che gnanca quel Tantalo,
Crudelissimo pare perverso,
Che ze stà condanà da Mercurio
A la sè e a la fame in eterno,
E che sin al barbuzzo el ze imerso
In t'un lago de l'orido inferno,
Dove arente de lu ghe sta un alboro,
Tuto cargo de fruti belissimi,
Che lo fa de continuo languir,
Senza mai che ghe possa riuscir
La so boca de meterghe su,
Mi no credo che gnanca colù,
Sempre in vogia restando cussì,
Più la vogia el patissa de mi
Mentre stago aspetandote ti.
E guai che intanto,
Per bon impianto,
La previdenza
Col mandarme la luliaga
No sanasse la mia piaga,
Vegnindo a lusingar la mia pazienza.
Quando che sta luliaga la scomenza
A bel belo a varesar
Me tiro solo
Soto la pergola,
Che go in tel brolo,
E becolando
Qua e là pian pian,
E zacolando
De man in man
Che maturando
L'ua se me va,
Mi, de sto passo
Andando avanti
Sempre cussì,
I graspi miseri
In pochi dì
Spogi ghe lasso
Là tuti quanti
Dal primo a l'ultimo
Che i fa pietà;
E 'l ze un miracolo,
Proprio de queli,
Se fin el pecolo
Mi no ghe becolo
Mi no ghe zacolo
Quando i graneli
Go terminà.
Ma grazie a Dio
Za ze finio
El gran suplizio
De l'aspetar.
Anima mia consolite,
Nissun te lo contrasta,
Ti ga aspetà che basta,
Ze tempo de goder.
Za son nel cimento:
Che angossa, che smania,
Che spezie de insania,
Che gusto che sento,
Che novo piacer!
Son in campagna;
Che bel aspeto,
Che gran cucagna
Per ti Zaneto!
Mora, dora, oseleta, biancheta
Marzemina, refosco, corbina,
Moscatela, gropela, forcela,
Sbrindolona, biancona, rossona,
Malvasia, picolit, e madera,
Paradisa, vison, cogionera,
Peverela, rabiosa, verdise,
Gata, schiava, calabria, pignola,
Passa, nazia, zibibo, rubola,
Dove dove me chiama la gola?
Dove prima òi da meter el dente?
«Via scomenza da quela più arente»,
El me dise un graspeto vicin,
«E po dopo continua pian pian
Divorandone tute drioman,
Che za questo ze 'l nostro destin.»
Caro graspeto,
L'invido aceto,
In furia subito
Son qua da ti.
Mo caro, mo belo,
Te vedo, ti è quelo;
Lo so, no gh'è dubio,
Ti è fato per mi.
Paradisa i te chiama, mi ritegno
Perchè un gusto ti ga paradisal,
Gusto che a quel del netare equival,
Vin che se beve nel celeste regno;
E za che ti ti ga la prima el vanto
Col to mosto prezioso
De bagnar el gargato a sto goloso,
Vogio de ti dir tanto
De meterte a l'imparo
Del gran friularo,[1]
In versi, in rime,
In stil sublime,
Per ogni parte
Fruto divin,
Vogio onorarte
Senza confin,
E note e dì
Sempre cussì
Vogio... ma zito,
Cara gropela,
E peverela,
E moscatela,
Zelo un delito
Se una sorela
Ve voi lodar?
Coss'è sta invidia,
E sto sbragiar?
Za tute quante
Ve vegno subito
A vlsitar.
Caro zibibo,
Gustoso cibo.
No ze pussibile
Che mi me sapia
De ti scordar.
No malvasia,
Anima mia,
No vago via;
Gnanca in conscienza
No posso andar.
Tasi, rossona,
Abi pazienza;
Via sbrindolona,
E ti, biancona,
No strepitar.
Si, cara mora,
Sì, bela dora,
Son vivo ancora
La marzemina,
La secondina,
E la corbina,
Lassarò indrio?
Ah! no per bio
E l'oseleta,
E la biancheta
Vol far vendeta?
No, vegno in freta,
So qua, son qua.
E ti, rubola,
E ti pignola,
Coss'è mai sta?
El gran sconzuro
Per la mia gola!
No fè sussuro
Per carità.
Cara calabria,
Refosco e nazia,
Chi de vu altre,
Chi mai se sazia?
Chi, bona passa,
Chi mai te lassa
In abandon? ...
Mi son parzial?
No star a crederlo,
I dise mal,
Che mi no tolero
Sta distinzion.
So qua vidon;
Oe cogionera,
Oe de madera,
Cara verdise,
Ochio pernise,
Schiava, moscata,
Proseco, gala,
Via perdonè;
Za se no moro
Da tute coro,
Ma no criè.
Cossa mai fazzo?
Boca! alto là;
Coss'è sto sguazzo!
Agiuto stomego,
Agiuto panza,
L'è stà un strapazzo,
L'è sta un disordine,
D'intemperanza
L'è stà un pecà.
Dopo aver divorà de sta misura
Trentado graspi in manco de mezz'ora,
Alzo la boca alfin da la pastura,
Stanco za de magnar, no sazio ancora.
Sobrietà la me dise «va via»
Che ghe resta la gola voria,
E me fermo indeciso, incantà,
Tra la gola e la sobrietà.
Cussì stupido, imobile, muto
Resto incerto per qualche menuto,
Nè go tanto de forza che rega,
Za 'l gargato da capo go suto,
Sento 'l stomego che squasi se sbrega:
D'ansietà paralitico tuto
La so vogia el me dise, el me spiega,
E la vida el se chiama in agiuto,
E de darghene un graspo el la prega;
Co la gola, pecà cussì bruto,
No gh'è caso che possa far lega
La virtù de la sobrietà.
Cara, son qua;
Per ben saver.
Per ben capir,
Per amirar,
Quanto sto fruto prezioso el sia
S'à da veder,
S'à da sentir,
S'à da gustar,
Un graspo de proseco o malvasia.
L'è cussì belo,
Cussì badial,
Sto caro fruto,
Che in belezza e bontà tuto l'avanza,
Anzi, credelo,
Che lu ze tal,
Che 'l ga in lu tuto
D'ogn'altro el belo, el bon e la sostanza.
Che naranze, che limoni,
Che castagne, che maroni,
E che angurie, che meloni,
Che susini, che armelini,
Che verdassi, che biancassi,
E che brombola, e verioli,
Che pometi lazzarioli,
Che marasche, che sarese,
Che botiro, che francese;
Che nosele, che nespole e cornole.
Che figheti, che perseghi e zizole,
E che framboe, che giasene e fragole!
Tuta roba che porta la freve,
Tuta roba che fa stomegana,
Che falsifica el sangue, che scana,
Che la vita precipita in breve.
Se fra i denti me struco un granelo
De sta cara proseco gentil
Torno zovene, torno putelo,
De l'età sento ancora l'april,
Me par proprio chiuchiar el cavielo
De mia mare che tete me dà.
E de fato se prova e se vede,
Che slatando i puteli la nena
La ghe dà de sto fruto, e in sta fede
Che de late la boca sia piena
Chiuchiar late i puteli se crede
Quando mosto chiuchiando i se va.
O fruto amabile,
Fruto godibile,
No ze spiegabile,
No ze dicibile,
El piacer novo,
Che gusto e provo,
Che 'l cuor me toca
Co te go in boca!
Se go sconvolto el stomego,
Se sento in moto el gomito,
Mi no ricoro al medico,
La spizieria no incomodo,
No fazzo spese inutili,
Che ti ti ze 'l rimedio
Più natural, più facile,
Che cava dal pericolo,
Che dà conforto a l'anima,
Che svegia, che ressuscita,
Che comoda el ventricolo,
Che tien el corpo lubrico,
Che l'apetito stuzzega,
Che neta zo le viscere.
Come bogindo s'alza a pian pianin,
El mormora, el fa spiuma, el ciga, el cria
Fina che resta in tel tinazzo el vin,
E le sarpe ghe vien dessoravia,
Cussì de l'ua l'estrato marzemin
Me boge in panza co una sinfonia
De brontoloni, che me fa sogeto
A provar presto un salutar efeto.
E dopo sto contrasto, e sta bogia,
El putrido, che gera a mezza strada,
Vedendo che per lu la ze fenia,
E che darme nol pol la schiopetada,
Rabioso el volta bordo, e in cerca el va
De chi co l'ua no s'abia resentà.
L'ua ze un'antica insigne medicina,
Che à fato guarigion miracolose,
E dovarave tuti a la matina
Magnar ua co l'aguazzo in bona dose;
La porta più vantagio de la china.
De la tintura de viole e de rose,
E tanto se l'è fresca come fiapa
La fa quel che farave la gialapa.
Se l'autuno durasse eternamente,
E se ghe fusse l'ua sempre maura,
I medici, i spizieri, e certa zente,
Che vive in società co l'impostura,
Mandandoghene tanti impunemente,
Piutosto de guarirli, in sepoltura,
I andarave a finir tuti in rovina
Co la chimica e co la medicina.
Ma che scioco, che da gnente
In principii filosofici
Mi me perdo inutilmente,
No ghe abado a la rabiosa,
Che me chiama là darente,
Che me vol, che me ingolosa
Oh! co zala, co mostosa!
Cussì sconta tra le foge
Ti me fa vegnir le voge;
Cussì bela, cussì fata,
Come mai lassarte intata?
Mi resister no so più,
E le man te meto su.
Per sta cagna, per custia,
Cari amici, in cortesia
Sentì la mia passion quanto l'è viva,
E insin dove l'ariva.
Geri Tita, el mio putelo,
Malapena a casa el vien
Me presenta el so cestelo
De ua gresta tuto pien,
Me lo tiro da vicin,
E co ben me l'ò basà,
Ghe domando: chi Titin
T'à sta roba regalà?
«Mio sior santolo à volesto
Che ghe fazza sto servizio,
Che la meta drento in cesto»
Mo che testa! che giudizio!
Ga quel omo, alora esclamo,
Tita mio, son squasi gramo
D'averte ancuo dal santolo mandà
E lu dise «per cossa mai papà?
Perchè 'l te dà sta roba che fa mal.
Che bestia! ma no ze pecà mortal
A torla zoso cussì crua.
«No, papà, la ze fata sì sta ua.» «Senti un granelo,
Senti anca ti...
Caro putelo
Nol basta a mi.»
Va, natura, va via da sto cuor,
Che son pare no me ricordar;
Debolezza d'un tenero amor,
Go per l'ua tanta smania e passion
Che se 'l fio me vien l'ua a contrastar,
Più no sento che pare ghe son.
Con ansietà
Da dispara
Me taco là
Nè tiro el fià.
Ma el putelo tira i ochi,
El me salta sui zenochi,
E 'l me dise adolorà
«Papa mio da quel che vedo
No la ze minga cussì:
Che la fazza mal no credo
No la magnistu anca ti?
Ti me ga
Minchionà
Ti papà»
No; go 'l stomego agravà,
E per chi no ga alcuna sunauza
L'ua, tel zuro, no pol farghe ben,
La produse dolori de panza,
La ze un tossego, un vero velen.
Co sta sorte de storiele,
Co le bone, co le bele,
El putelo infenochiando,
Mi ghe vago destrigando,
Da la gola strassinà,
Tuta l'ua che i ga donà,
Tanto che quel inocente.
Che me stava sempre arente,
Testimonio con dolor
Del mio genio distrutor,
Co l'à visto vodo el cesto
Più frenar nol s'à podesto,
E lagnandose, e pianzendo,
El me andava via disendo:
Tuta l'ua ti m'a magnà
Sior cativo de papà;
Al so pianto sul mumento
Improviso el pentimento
Tropo tardi me ze nato,
E ò capio che per quel fato
Son un pare snaturato,
Pezo assae del primo omo,
Che coi fiochi n'à servio,
Perchè lu magnando el pomo
No à magna gnente a so fio.
Per l'ua mi son deboto
Un stupido ridoto,
So pezo d'un putelo,
Perchè co vado in leto
Do graspi me ne meto
Sul scabelo,
E apena che son soto,
Da la gola sedoto,
Cussì de quando in quando
La vago becolando
E la matina alzà,
Go el gusto sul palà.
I sogni che mi fazzo,
Altro che d'ua no i ze;
Sogna bulae el regazzo,
Sogna corone el re,
Sogno anca mi cussì,
La note indormenzà,
Quel'ua che tuto el dì
Me tien svegià.
E co sorto dal mio leto
Co del mosto mi me lavo.
Che soave, che dolce, che grato
Che balsamico, puro, odoreto!
El cuor dal giubilo
Me salta in peto;
Chi più beato
Ghe ze de mi?
Vogio lavarme
Sempre cussì.
Chi se lava, chi se bagna,
Co sto mosto ghe guadagna,
El se neta ogni magagna,
E i so soldi lu sparagna,
Che in unguenti adesso el magna,
O nel'acqua de Cologna
Bona d'onzerse la rogna,
E da far dolor de testa,
Co una spuzza da carogna,
Che tre mia lontan ve impesta,
Sin che via scampar bisogna.
Da mi no nissun no scampa,
Che sul muso se me stampa
La vernise e 'l tacaizzo
De quel'ua che struco e schizzo,
E lo zuro, sì per bio,
Sin le mosche me vien drio.
O vu altre superbone,
Galantone,
De matrone,
Capriciose,
Mate fisiche furenti
Per aromi e per unguenti,
Per le lagreme odorose,
Che per tuto profumade,
Peto, naso, boca, denti,
Mande fora per le strade
Odorazzi i più fetenti,
Vegnì qua, vardeme mi,
E po tute fè cussì.
Care mie vegnì pur qua,
Osserveme,
Esamineme,
Come magno de sto frito,
Che per mi va sora tuto.
Za da l'alba, e co l'aguazzo,
Divorando, sin a sera
Ghe ne fazzo - tanto sguazzo,
Che impenir fra bianca e nera
Podarave un gran tinazzo.
Ah! perchè l'insaziabile stomego
fio go mi de Rompini e Zucheti,
De costori che pol senza incomodo
Divorarse dusento oseleti
La matina per far colazion.
Come cento eli magna, e i ze in do,
I ga tripe da vache, e da bo,
E nualtri coi nostri panzini,
In confronto se ze mossolini.
Ma za me supero,
Sazio za son,
Alfin ricupero
La mia rason.
Tre graspi miseri,
E po no più;
Ze ben el vincerse
La gran virtù.
Parto, no te irabiar,
Vigneta mia, da ti,
La gola a moderar
Te torno a visitar
Doman avanti dì,
Ma intanto abandonar
Te devo, o cara.
Oe sentì quel che ve par:
Se anca son cussì menuo
Se no conto gnanca un spuo,
Se pur fusse militar,
E che a chi se distinguesse
El sovrano permetesse
De donar un campo d'ua,
Voria far le gran prodezze,
Superar le gran fortezze;
Andarave a panza nua
Su la boca del canon;
Che l'idea de quel gran premio,
Descazzando la paura,
Col portarme via la mente
Col cambiar viltà in bravura,
Me farave el più valente
El più bravo soldadon.
Oe poeti, Petrarca, e ti Dante,
Che contè de le buzzare tante
De le vostre do care, do bele
Solevandole sora le stele
E lodando el so naso, i so ochi
I so brazzi, le gambe, i zenochi
Quanto più gavaressi aquistà,
Se l'ua sola gavessi cantà,
Le so doti, le so qualità.
La belezza de Laura e Beatrice
Tuti sa che ga avudo confin;
La ga buo quela sorte, quel fin
Che ga sempre qualunque beltà;
E questa in tele done ze una cossa
Che se logora e passa in t'un mumento,
Che arente de la cuna ga la fossa,
Un fior la ze che se tien suso a stento
E che durar no pol,
Che teme un fià de vento,
Che teme un fià de sol.
Vardè là do ganassete
Bele, lucide, rossete,
Fresche, morbide, grassete
Morbinose, boriosete,
Deventae le ze custie
Brute, palide, sconie;
A mumenti le desmete
La so boria, el so morbin;
Le se vede presto presto
Andar tute zo de sesto,
E le pianze el so destin.
Questo xe 'l pregio
De la beltà,
El vanto egregio
Che la se dà.
La miserabile
Beltà ze questa,
Che porta triboli
A più d'un cuor,
E che a la presta
Squasi in t'un atimo
La casca languida
Come ogni fior,
Vegnì pur qua poeti,
Vegnì pur qua minchioni
Troveghe a l'ua difeti,
Da bravi se se boni.
L'ua no sente 'l rigor de l'età
Bela l'ua sempre più la se fa;
E piu gusto e dileto la dà
Quanto più su la vida la stà.
Co la ze in fior,
Co la ze verde,
L'ua ga 'l so odor,
Fata maura
Gnente la perde,
Anzi l'aumenta
Del so decoro,
La rapresenta,
La vince l'oro
Col so color.
Oh! capo d'opera
Del gran lavoro
De la natura;
Ti ze un ristoro,
Che sempre dura;
Ti ze un tesoro
Ti ze un stupor.
Quel che de ti go in boca
Tanto no pol spiegar
Che possa paregiar
Quel che go in cuor.
Dovaressi oramai disinganarve.
Cari poeti; el pegaso, el parnaso,
L'ipocrene, le muse, el bus...
Dei quali vualtri fè sempre gran caso
I ze sempiezzi tuti, e sogni e larve.
Che senza anca de quei son persuaso
Capace de far versi che ognun sia
Quando el ga in boca un gran de malvasia.
Per mi la trovo che la fa sto efeto,
E se volessi averghene una prova
In bota ve la dago i a t'un soneto.
Ua, cossa zestu mai? l'agricoltor
Dise che 'l so conforto ti ti ze,
Un ben che dà compenso al so suor,
Che senza tante strussie vien da se.
Un elisir, un balsemo del cuor,
Vero bocon da prencipi, da re,
Che nasce da la vigna del signor,
Piantada da le man del bon Noè.
El pasto dei putei, l'anima mia,
Un fruto raro, celestial, divin,
Che a tuti i fruti ghe la porta via.
Ua cossa zestu mai? ti è quela infin,
Che abastanza lodar no podaria
Disendote che ti è mare del vin.
