Dis viols

From Wikisource
Jump to navigation Jump to search

Notedonös. Lovepolots suköl in Volapük, fa redakel, "Dis Viols" e "Tem Lifik" papüboms dälü lautel dl. Oliver Wendell Holmes, de Boston, Pebaltats. Kanon tuvön liänis rigädik in nelijänapük, in "Plofed len Göledatab" e "Monosölel Göledataba" spetivo.


Nams binoms kalodik, logod vietik,
  Pebs ofik no kömoms e goloms fovo;
Logs ofik pakikoms ta lif e lit; -
  Plifolöd kloti äs nif su nif.
E pladolöd ofi kiöp fiols floloms.


Ab no dis ston fomik pegavöl,
  Al begön dlenis se logs foginik;
Kluzif boadik lonetik soalo
  Osagom das vilgin seistof iso
  Takedöl püdiko dis sils püdik.


E bims gedik ko lams gianik
  Otuloms jadis omsik zio
Al mekön solastalis filedöl dagik
  Kels dlinoms glüni se glun, e jedoms
  Bledis edeilöl etas su sep.


Ven yats goloms ovü lams at,
  E böds vokoms da bleds otas,
E ven gölogafluks e kätans faloms,
  Madoöl dub hit sola flukatimik,
  Dotolöd leno, onoetof valikosi.


Korals okanitoms gödelo plo of
  Plekis vädelik de lams geilik,
E vog musigik valik flolatima,
  Trilöl dis sil in mul folid,
  Oglidom ofi ko vok gölikün.


Ven jads gloföl ogoloms lefüvedo,
  Tulöl zio äs su joniel,
Lügels smalik in tegam blägik,
  Cäfils bösetik, sliföl da yeb,
  Ofeifoms vendelo plekis plo of.


Vulils bimas otuvoms lätiko
  Fanübi in kel seistof takedo
Ed opoloms püfi pesumöl se sep
  As bledis e flolis äl sils. Somo
  Lan kel ävamom püfi xänomös!


  If ek, pemotöl de bludot gudlikum
  Osäkom, "Vilgin kiof läsof?"
Sagolöd atosi: "Te bled müedik,
  Kel esteifom flolön in nif, seistom
  Pedeiläföl kiöp viols floloms."



Se Kosmopolan 1891, Nüm: 1, Pads: 6-7.