Dedicazione a Monsignor Gradenigo
From Wikisource
| Dedicazione a Monsignor Gradenigo vescovo di Ceneda de Angelo Maria Labia XVIII secolo |
| Informassion su la proveniensa del testo |
Da vu, che se' tra i omeni più doti,
E tra la zente più discreta e onesta,
Perchè in sti dì ve solevè la testa
Vien la mia Musa con sti so' stramboti.
No la sarìa so' colpa, ma del Loti
Se una temerità la fusse questa;
Si ben che nè mordace, nè inonesta
No la ga el mal del Bafo, nè del Doti.
Compatila, ve prego, Monsignor,
Dèghe la pastoral benedizion
Se la vedessi mai dar in furor;
Perchè, protesto, tuta la so passion
No l'è causada che dal tropo amor
A la so Patria e a la so Religion.
